Նորատուսցի Արան մեղադրվում է զինված խուլիգանության մեջ. Գործը դատարանում է

Հանցավոր աշխարհում որպես Նորատուսցի Արա հայտնի Արա Բանդուրյանի մասնակցությամբ խուլիգանության դեպքի առթիվ հարուցված քրեական գործով նախաքննությունն ավարտվել է։ «Փաստինֆո»-ն դատալեքս դատական տեղեկատվական համակարգից տեղեկացավ, որ գործը մարտի 28-ին մուտք է եղել Երեւանի ընդհանուր իրավասության դատարան։

Ըստ մեղադրանքի՝ նա 2018թ․ հոկտեմբերի 13-ին Երևան քաղաքի Հյուսիսային պողոտա 4/1 հասցեում գործող «Հուկաման» ակումբում, զուգորդված ակումբում գտնվող անձանց նկատմամբ բռնություն գործադրելու սպառնալիքով՝ նույն ժամանակահատվածում քննությամբ չպարզված անձից ապօրինի ձեռք բերած և կրած 9մմ տրամաչափի հրազեն հանդիսացող ատրճանակով կատարել է խուլիգանություն։
Ավելի վաղ տեղեկացրել ենք, որ Արա Բանդուրյանը, մի խումբ անձանց հետ այցելել է Երևան քաղաքի Հյուսիսային պողոտայում գտնվող ակումբներից մեկը, որտեղ առերևույթ անհարգալից վերաբերմունք է դրսևորել ակումբի մյուս հաճախորդների, աշխատակիցների նկատմամբ։

Մասնավորապես՝ կոտրել են ակումբի բաժակները, մոխրամանը նետել պարահրապարակ, ապա նաև կրակոցներ արձակել պատի ուղղությամբ, որի հետևանքով կոպիտ կերպով խախտվել է հասարակական կարգը:

Նրան մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով եւ 235-րդ հոդվածի 1-ին մասով։ Որպես խափանման միջոց է կիրառվել գրավը։

Աղբյուր` Փաստինֆո