Փաշինյանի «Դսեղային վոյաժի» հակառակ կողմը

2019 թվականի փետրվարի 19-ին ՀՀ վարչապետ Նիկոլ Փաշինյանն ուղղաթիռով մեկնեց Դսեղ` այնտեղից Հովհաննես Թումանյանի անունից մեզ ուղերձ հղելու։

Շատերը քննադատեցին Փաշինյանին պետական ուղղաթիռն անտեղի օգտագործելու և օդային տարածքը «վայելելու» համար։

Որպեսզի մենք դիտարկենք հարցի փաստացի կողմը և հեռու մնանք էմոցիոնալ զեղումներից, ես հարցում հղեցի ՀՀ վարչապետի աշխատակազմ` ճշտելու համար, թե որքան է արժեցել Փաշինյանի ուղղաթիռային «վոյաժը» դեպի Դսեղ։

Պատասխանից պարզ դարձավ, որ այն մեր հանրային «գրպանի» վրա արժեցել է 524.694 ՀՀ դրամ (կից ներկայացնում են հարցմանս պատասխանը)։

Կատարենք մոտավոր ու պարզ հաշվարկ։ Ենթադրենք ՀՀ վարչապետը Դսեղ էր մեկնում ոչ թե ուղղաթիռով, այլ իր կորտեժով։ Ենթադրենք, որ այդ կորտեժում ներառված է 4 մեքենա, որոնցից յուրաքանչյուրը 10 կմ-ի համար ծախսում է 2,5 լ վառելիք, որի ենթադրելի արժեքը 500 ՀՀ դրամ/լ է։

Երևանից Դսեղ հեռավորությունը կազմում է 87կմ  (հաշվենք 90 կմ)։ Երկկողմանի ճանապարհը կկազմի 180կմ։

Եվ այսպես

180կմ x 500 դր x (2,5լ ÷10կմ x 4 մեքենա) = 90.000 ՀՀ դրամ (երկկողմանի ճամփորդության համար)։

Այսինքն, անգամ հաշվի չառնելով մեր պետական միջոցների սղությունը, մշտապես կոռուպցիայի և չարաշահումների մասին տարբեր ամբիոններից աղաղակող պարոն Փաշինյանը, հագուրդ տալով իր օդային «հաճույքներին» կատարել է 524.694 – 90.000 = 434.694 ՀՀ դրամ անիմաստ գերծախս։

Բայց սա դեռ ամենը չէ։

Ով է մեր մեջ ամենամիամիտը, որ մտածի, թե Փաշինյանը ուղղաթիռի թռիչքային հրապարակ է գնացել ոտքով, հեծանիվով կամ տաքսիով։ Իհարկե նա այնտեղ ժամանել է իր կորտեժով։

Դժվար է նաև պատկերացնել, որ Փաշինյանը Դսեղում ուղղաթիռից ոտքով կամ սամոկատով է գնացել հանդիսությունների հրապարակ։

Այստեղ նույնպես նրան դիմավորել է վարչապետական կորտեժը, որը պրակտիկորեն նույն ժամանակում մի թռիչքային հրապարակից հասել է մյուսը։

Այսպիսով, Փաշինյանը խնայողություն չի արել ոչ ժամանակի, ոչ հանրային միջոցների տեսանկյունից և նրա Դսեղյան «վոյաժը» մեզ վրա նստել է ոչ թե 434.694 ՀՀ դրամ, այլ 524.694 ՀՀ դրամ։ Չի եղել նաև ժամանակի խնայողություն։

Ստացվում է, որ մենք ազգովի կատարում ենք Փաշինյանի քմահաճույքները։

Եվ թող մեր շուրջ 1 մլն աղքատ բնակչությունը ու յուրաքանչյուր երրորդ սոված քնելու գնացող աղքատ երեխան սպասեն:

И пусть весь мир подождет …

Հ.Գ. Պարոն Փաշինյան, 524.694 ՀՀ դրամի վերջին 94 դրամը արդեն չափից ավելի էր … 

Հ.Գ.Գ.  Պատկերացնո՞ւմ եք քանի լվացքի մեքենա կարելի է գնել այդ գումարով …

Մարինա Խաչատրյան