Ութ երկրում միաժամանակ թելադրություն գրեցին ու նախագիծը նվիրեցին Հովհաննես Թումանյանի հոբելյանին

Հայոց լեզվով հաղորդակցվելու, հայերեն ճիշտ և անսխալ գրելու կարևորությունն ընդգծելու նպատակով մարտի 30-ին Հայաստանում և արտերկրում անցկացվեց «Թելադրություն» նախագիծը:  Նախաձեռնության շրջանակում 55 տարբեր հարթակում մասնակիցները թելադրություն գրեցին` նվիրված Հովհաննես Թումանյանի 150-ամյակին:

«Նախագիծն իրականացվում է Երևանում, ՀՀ մարզերում, Արցախում և սփյուռքում` Ռուսաստանում, Բելառուսում, Չեխիայում, Ուկրաինայում, Սիրիայում Գերմանիայում: Մասնակցել են բոլոր ցանկացողները: Նախորդ տարի մասնակցել է 333 մարդ, եղել են 12-73 տարեկան մասնակիցներ: Այս տարի գրանցվել է 1900 հոգի»,-այս մասին մարտի 30-ին Հ. Թումանյանի թանգարանում լրագրողների հետ զրույցում ասաց «Բաց կրթություն» հասարակական կազմակերպության տնօրեն Հայկ Դավեյանը:

Նրա խոսքով`այն մարդիկ, որոնք անսխալ են գրում թելադրությունը,  խրախուսական նվերներ են ստանում: Գնահատականներ չեն լինում, աշխատանքները ստուգում են տվյալ հարթակներում ներկա բանասերները:

«Այս նախագծով ցանկանում ենք կարևորել հայերենի դերը, իմացությունը, գրագիտությունը, սփյուռքում մայրենի լեզվով հաղորդակցվելու անհրաժեշտությունը: Այսօր համացանցում լատինատառ գրելը լուրջ խնդիր է ոչ միայն արտերկրում, այլև Հայաստանում»,-նշեց Դավեյանը:

Թելադրության տեքստ գրելու նպատակով «Բաց կրթություն» Հ/Կ-ի տնօրենը դիմել էր Լեզվի պետական կոմիտեին:

Թելադրության տեքստի հեղինակ, մանկագիր Երազիկ Գրիգորյանը, որը Թումանյանի թանգարանում անձամբ թելադրեց այն, ասաց, որ թելադրությունը կոչվում է «Լեռան գագաթի խորհուրդը»: «Հերոսը Թումանյանն է, չնայած նրա անունը չի տրվում տեքստում: Խոսվում է մի օծյալ բանաստեղծի մասին, որը լուրջ դերակատարություն է ունեցել հայ ժողովրդի հոգևոր զարգացման գործում, և այդ խորհուրդը նրան տրվում է լեռան գագաթից: Լեռան անունը նույնպես չեմ նշել, բայց  նկատի եմ ունեցել Արարատը:

«Թելադրությունը» զանգվածային, տարբեր տարածքներում միաժամանակյա ընթացող միջոցառում է, որի ընթացքում մասնակիցները գրում են թելադրության նույն տեքստը։ Յուրաքանչյուր ցանկացող կարող է մասնակցել միջոցառմանը՝ անկախ տարիքից և հայերենի տիրապետման մակարդակից: Այս տարի նախագիծը ընդլայնել է իր աշխարհագրությունը՝ ընդգրկելով ավելի շատ քաղաքներ և երկրներ: Նախագծին միացել են Տավուշի, Գեղարքունիքի, Արմավիրի, Կոտայքի, Շիրակի մարզերը, Երևանը, Արցախի հանրապետությունը։ Նախագծին են միացել նաև Ռուսաստանը՝ իր հայաշատ քաղաքներով, Բելառուսը, Գերմանիան, Չեխիան և Շվեյցարիան։ Թելադրություն են գրելու դպրոցներում, համալսարաններում, թանգարաններում։