23 մարդու հիմարի տեղ դրած, մեր աչքերին թոզ փչելով, ընտրություն կատարեցին. Լավրենտի Միրզոյան

Հասարակություն 1 Ապրիլ, 2019 20:30

Արդեն տեղեկացրել էինք, որ Հանրային հեռուստառադիոընկերության խորհրդի նախագահի թափուր տեղի համալրման համար հայտարարված մրցույթի ձայների մեծամասնությամբ ընտրվել է Արա Շիրինյանը: Արա Շիրինյանը ստացել է 3, Մեսրոպ Մովսիսյանը 1, Տիգրան Հակոբյանը՝ 1 ձայն:

Մրցույթի անցկացման համար ձևավորված հանձնաժողովին մասնակցության հայտ էր ներկայացրել 23 թեկնածու։

ԼՈՒՐԵՐ․com-ի հետ զրույցում ՀՌԸ-ի խորհրդի նախագահի թեկնածու Լավրենտի Միրզոյանը, թեմային անդրադառնալով, ասաց.

«Ես իմացա, որ ընտրվել է Արա Շիրինյանը, ով ռեժիսոր է։ Ես չգիտեմ, թե ոնց են ընտրել այդ 3 հոգուն, ինչո՞ւ բոլորին չեն հրավիրել զրույցի՝ դրանից հետո ընտրություն չի արվել։ Ես չգիտեմ՝ ինչ չափորոշիչներով են առաջնորդվում։ Ես հարցը բարձրացրել եմ, որ օրենքի խախտումով մրցույթ չեն անցկացնում։

Արա Շիրինյանը, ապարատուրայից բացի, նույնիսկ հայոց լեզվին չի տիրապետում, նույն էլ մնացածը։ Ինչպե՞ս են իրենք եթերի լեզու մաքրելու։ Ինչպե՞ս է ընտրվել, որ այդ 23 հոգու մեջ լավագույնն են՝ Արա Շիրինյանը, Մեսրոպ Մովսիսյանը և Տիգրան Հակոբյանը․ ես վստահ եմ, որ նրանք նույնիսկ ծրագիր չեն ներկայացրել»։

Հարցին, թե արդյո՞ք այս ընտրությունների մեջ Միրզոյանը քաղաքական ենթատեքստ է տեսնում, նա պատասխանեց․

«Ես ոչինչ չգիտեմ, բայց հույս ունեի, որ նոր իշխանություններ են, ընտրությունները արդար կլինեն։ Ես էն գլխից էլ ասում էի, որ նախապես որոշված է՝ ով պետք է լինի։ 23 մարդու հիմարի տեղ դրած, մեր աչքերին թոզ փչելով, ընտրություն են կատարում։ Վիրավորված եմ նրա համար, թող 23 մարդուն էլ կանչեին, ծրագրերը ներկայացնեին, քննարկում լիներ։

Ոչ մի բան չեն ասել ինձ, ես 25 էջանոց ծրագիր եմ ներկայացրել, բայց այս պահին իրենց պետք է մի խամաճիկ, որ ինչ ասեն՝ անի։ Ռուսերեն կրթությամբ ռեժիսորը ինչպե՞ս կարող է վերահսկել եթերը։ Անգամ չի ստուգվում՝ մարդը հայերենի տառերը ճանաչո՞ւմ է, թե՝ ոչ․ սա օրենքի խախտում է։ Բա էն 20 մա՞րդը։ Այդ երեքից ոչ մեկն արժանի չէ այդ պաշտոնին»։

Լավրենտի Միրզոյանը նշեց նաև, որ որոշել է այլևս չանդամակցել «Լրագրողների միությանը» և Սաթենիկ Սեյրանյանից պահանջելու է իր այսքան տարիների անդամակցության գումարը (մոտ 570․000 ՀՀ դրամ)։

Ասպրամ ՓԱՐՍԱԴԱՆՅԱՆ