Գյումրու թիվ 37 ավագ դպրոցի տնօրենն անսպասելի հրաժարական է տվել. աշակերտները պահանջում են նրա վերադարձը

Այսօր՝ ապրիլի 3-ին, լարված իրավիճակ է ստեղծվել Գյումրու թիվ 37 ավագ դպրոցում։ Առաջին դասաժամից հետո աշակերտները հրաժարվել են շարունակել դասերը՝ պահանջելով տնօրեն Աստղիկ Ավետիսյանի վերադարձը դպրոց: Վերջինս, ըստ աշակերտների և ուսուցիչների, անսպասելի հրաժարականի դիմում է ներկայացրել: Ըստ Շիկրակի մարզի կրթության, մշակույթի և սպորտի վարչության պետ Հրայր Կարապետյանի՝ տնօրենի դիմումը դեռ մակագրված չէ և նա փաստացի շարունակում է աշխատել դպրոցում:

ԼՈՒՐԵՐ.com-ը կապ հաստատեց դպրոցի աշխատակազմի ներկայացուցչի հետ, ով տեղեկացրեց՝

«Այս պահին դպրոցում ամեն ինչ նորմալ է: Բողոքի պատճառը տնօրենին դպրոց վերադարձնելն է:

Հստակ չենք կարող ասել, թե որն է դպրոցի տնօրենի հրաժարականի պատճառը»:

Աստղիկ Ավետիսյանը Գյումրու թիվ 37 դպրոցի տնօրենի պաշտոնում վերընտրվել էր  2018 թվականի հոկտեմբերի 5-ին:

Հիշեցնենք, որ 2018 թվականի նոյեմբերին Շիրակի մարզի դատախազությունում քրեական գործ էր հարուցվել Գյումրու թիվ 37 դպրոցում առերևույթ կաշառք տալու, կաշառք ստանալու և կաշառքի միջնորդության փաստերի առթիվ:

Գյումրի քաղաքի մի բնակիչ ՀՀ ոստիկանության Շիրակի մարզային վարչության Մուշի բաժնում հաղորդում է տվել այն մասին, որ աշխատելով «Գյումրու թիվ 37 դպրոց» ՊՈԱԿ-ում որպես համակարգչային օպերատոր, 2018թ. հունվարից մարտ ամիսներին, իր հաստիքը չկրճատելու և աշխատանքից չհեռացնելու դիմաց, դպրոցի տնօրենին, վերջինիս պահանջով, տվել է իր ամսական աշխատավարձի կեսը։ 

Գյումրու թիվ 37 դպրոցում տեղի ունեցած դեպքերի առթիվ հարուցվել է քրեական գործ՝ առերևույթ կաշառք տալու, կաշառք ստանալու և կաշառքի միջնորդության փաստերի առթիվ՝ ՀՀ  քրեական օրենսգրքի 311-րդ հոդվածի 1-ին մասի, 312-րդ հոդվածի 1-ին մասի և 313-րդ հոդվածի 1-ին մասի հատկանիշներով:

Ասպրամ ՓԱՐՍԱԴԱՆՅԱՆ