«Խամաճիկ էր պետք»․ անհամաձայնություններ Հանրային ռադիոյի տնօրենի ընտրության հարցում

Հանրային ռադիոյի տնօրենի ընտրության շուրջ նոր զարգացումներ են տեղի ունենում։ Ռադիոհաղորդավար Գարեգին Խումարյանի ընտրությունը, կարծես թե ոմանց չի գոհացրել։ 

ԼՈՒՐԵՐ․com-ի հետ զրույցում Հանրային ռադիոյի տնօրենի թեկնածու, հաղորդավար Տիգրան Հարությունյանը հրաժարվեց մեկնաբանել մրցույթի արդյունքը․ «Ես կմեկնաբանեմ մեկ նախադասությամբ, կարծում եմ՝ դուք կհասկանաք․ հրաժարվում եմ մեկնաբանել մրցույթի արդյունքները։ Հետևությունները թողնում եմ Ձեզ»,- ասաց նա։

Հարցին՝ կարո՞ղ ենք ենթադրել, որ համաձայն չի արդյունքների հետ, նեղվածություն ունի կամ ինչ-որ խնդիր է տեսնում, Հարությունյանը պատասխանեց․ «Այդ հարցը կարող եք ուղղել մեր խորհրդի քարտուղարին և հարցնել, թե ինչպես են ձայները բաշխվել»։

Նշենք, որ մեզ հետ զրույցում Հանրային հեռուստառադիոընկերության խորհրդի անդամ, Հանրային ռադիոընկերության գործադիր տնօրենի ընտրության մրցութային հանձնաժողովի քարտուղար Լևոն Գալստյանը հայտնել էր, որ ձայները բաշխվել են հետևյալ կերպ՝ Գարեգին Խումարյան-2, Հռիփսիմե Առաքելյան-1, Տիգրան Հարությունյան-1, Գրիգոր Նազարյան-1:

Հանրային ռադիոյի տնօրենի թեկնածու, Լեզվի տեսչության նախկին պետ Լավրենտի Միրզոյանը նույն կարծիքին է՝ ընտրությունն անօրինական է կատարվել, առանց չափորոշիչների և հանձնաժողովը վաղուց իմացել է՝ ով է ընտրվելու․ «Ես Գարեգին Խումարյանին չեմ ճանաչում, նրա հայրիկին՝ Կորյուն Խումարյանին եմ ճանաչում, որն ավելի հայտնի է ռուսական լրատվության դաշտում, քան հայկական։ Նրա որդու ընտրվելը պայմանավորված է հանգամանքով, որ նրա ընկերներն են հանձնաժողովի մեջ և որոշել են՝ ինքը լինի»,- ասաց նա։

Անդրադառնալով խոսակցություններին, որ Հանրային ռադիոյի տնօրենի ընտրությունը հետաձգվում էր՝ Հանրային հեռուստառադիոխորհրդի նախագահի ընտրությունով պայմանավորված, որպեսզի ՀՌԽ նախագահի հետ համաձայնեցվեր Հանրային ռադիոյի տնօրենի ընտրությունը, Միրզոյանը չբացառեց․ «Այո՛, դա էլ նշանակություն ուներ։ Արա Շիրինյանը (ՀՌԽ նորընտիր նախագահ) երբեք Լավրենտի Միրզոյանին չէր նշանակի տնօրեն, որովհետև նման խելոք մարդ իրեն պետք չի, իրեն պետք է մեկը, որ ինչ ասի, կատարի։ Խամաճիկ էր պետք»,- նշեց նա։ 

Հանրային ռադիոյի տնօրենի թեկնածու, հաղորդավար Ալեքսանդր Սայադյանն էլ տեսակետ հայտնեց՝ պտուղը ծառից հեռու չի ընկնում․ «Գարեգին Խումարյանը իմ երկար տարիների գործընկերոջ որդին է և մասնագիտական դաստիարակությունը անպայման կօգնի նրան։ Բնականաբար, դժվար կլինի, կարծում եմ՝ շատ քարեր կգցեն իր բոստանը, բայց հուսով եմ՝ կհաջողի։ Ես աշխատել եմ վերջին մեկ ամիսը հեռու մնալ տարատեսակ խոսակցություններից։ Ի՞նչ է, եթե հայրը լրագրող է, ինքն իրավունք չունի՞ այդ ոլորտում աշխատելու։ Հակառակը, նա շատ ավելի տեղեկացված է։ Եթե այդպես լիներ՝ հանձնաժողովի 5 անդամների հետ երկար տարիներ շփվել եմ, ուրեմն ինձ պետք է ընտրեին»,- նշեց Սայադյանը։

Նկատենք, որ Հանրային ռադիոյի տնօրենի համար հայտարարված մրցույթը հենց սկզբից էլ հարթ չէր ընթանում։ Մասնավորապես, ընտրությունից ընդամենը օրեր առաջ անհայտ պատճառներով ինքնաբացարկ հայտնեց տնօրենի ամենահավանական թեկնածու Ստեփան Զաքարյանը։ 

«Զաքարյանի պարագայում բարոյական տեսանկյունից ճիշտ կլիներ, որ ընդհանրապես թեկնածություն չդներ, որովհետև նա Հեռուստառադիոխորհրդի հանձնաժողովի անդամ էր  և բնականաբար շփվել էր մյուս անդամների հետ, որոնք դարձան այս հանձնաժողովի անդամ։ Իր ինքնաբացարկի մասին երեկ եմ իմացել և գտնում եմ, որ իմ ասած բարոյականությունից ելնելով էլ հրաժարվել է, թեև խաղաթղթերը խառնվել էին դեռ այն ժամանակ, երբ դրել էր իր թեկնածությունը»,- ասաց Սայադյան։

Նրա կարծիքով՝ Հանրային հեռուստառադիոընկերության նախագահ, ռադիոյի տնօրեն, հեռուստատեսության տնօրեն պետք է ընտրել ոչ թե մրցութային կարգով, այլ՝ նշանակումով։

Սոնա Հարությունյան