Թերություններ չեն ունենում այն իշխանությունները, ովքեր ոչինչ չեն անում. իմքայլական պատգամավոր

«Բոլոր ոլորտներում փոփոխություններ եղել են, և դրանք ակնհայտ են: Ոչ ոք չի կարող հերքել այս մեկ տարվա ընթացքում կատարված փոփոխությունները»,-ԼՈւՐԵՐ.com-ի հետ զրույցում ասաց «Իմ քայլը» խմբակցության պատգամավոր Արփինե Դավոյանը` անդրադառնալով Հայաստանում տեղի ունեցած իշխանափոխության մեկ տարվան:

Հարցին՝ արդյո՞ք նոր իշխանությունների կողմից, այնուամենայնիվ, եղան թերություններ, որոնք կարող էին չլինել, պատգամավորը պատասխանեց. «Ես կարծում եմ, որ թերություններ չեն ունենում այն իշխանությունները և, առհասարակ, այն մարդիկ, ովքեր ոչինչ չեն անում»:

Հեղափոխության արդյունքում ունեցած ձեռքբերումների վերաբերյալ պատգամավորը նշեց, որ մենք դրանք տեսնում ենք ամենօրյա ռեժիմով: «Կարող եք հետևել և տեսնել, որ ամեն օր տեղի է ունենում աշխատելաոճի փոփոխություններ, կատարվում են նոր բացահայտումներ, իշխանության հասանելությունը քաղաքացիների համար»,-ասաց Արփինե Դավոյանը` հավելելով, որ այս պահին իշխանության և հասարակության մեջ եղած հարաբերությունները նախկինում երբևէ չեն եղել:

Արփինե Դավոյանը հիշեց` նախկինում, երբ որպես քաղաքացի փորձել է իր խոսքը լսելի դարձնել, շատ դժվարությամբ է եղել, իսկ ում խոսքը լսելի է եղել՝ եղել է իր պնդաճակատության, համառության շնորհիվ: Նրա խոսքով` հիմա բավականին հեշտ է շփվել իշխանության ներկայացուցիչների հետ և խնդիրը լսելի դարձնել: Հարցին, թե բողոքի ակցիաների շատանալը և՞ս դրանով է պայմանավորված, թե՞ իսկապես խնդիրներ կան, որ անլուծելի են, պատգամավորը պատասխանեց. «Ես կարծում եմ, որ անլուծելի խնդիրներ իհարկե չկան, պարզապես մարդկանց բողոքի ակցիաները հաճախակի են դարձել, որովհետև այո՛, նրանց ձայնը լսելի է դարձել: Նրանք սկսել են վեր հանել այնպիսի խնդիրներ, որոնք վաղեմություն ունեն, արմատավորված են, և մարդկանց մոտ հիմա հույս է առաջացել, որ դրանք դեռ կլուծվեն»,-եզրափակեց Արփինե Դավոյանը: