Նոր Հայաստանում կոռուպցիա, միանշանակ, չկա. իմքայլական պատգամավոր

«Մեկ տարվա ընթացքում շատ բան է փոխվել` դրական իմաստով: Ստվերի դեմ պայքար կա, կոռուպցիայի դեմ պայքար կա, բյուջե են վերադարձվել միլիարդավոր դրամներ, ներվել են հարյուրավոր մարդկանց տույժեր, որոնք եղել էին երթևեկության տեսախցիկների և արագաչափերի կողմից գրանցված` մոտ 13 միլիարդի տույժ: Բոլոր ոլորտներում դրական փոփոխություններ են եղել»,-ԼՈւՐԵՐ.com-ի հետ զրույցում ասաց «Իմ քայլը» խմբակցության պատգամավոր Արմեն Փամբուխչյանը:

Հարցին, թե արդյո՞ք նոր Հայաստանում վերջնականապես վերացվել է կոռուպցիան, չկա՞ն հին ռեժիմով գործողներ, պատգամավորը պատասխանեց. «Միգուցե դեռ կան կաշառակերության դեպքեր, բայց կոռուպցիա չկա: Ինչի՞ համար: Որովհետև կոռուպցիան այն համակարգն է, որը գործում է «ներքևի օղակներից մինչև վերևի օղակներ», իսկ այդ համակարգը այժմ չկա: Կաշառակերության դեպքեր կլինեն, ուրեմն կբացահայտվեն, կպատժվեն և կվերանա ինչ-որ պահի: Կաշառակերությունը նաև մարդու ենթագիտակցության հետ է կապված, որոշ դեպքեր չեմ բացառում, որ կարող են լինել, իսկ կոռուպցիա, միանշանակ, չկա այժմ»,- ասաց պատգամավորը:

Խոսելով հեղափոխության արդյունքում եղած ձեռքբերումների մասին, Արմեն Փամբուխչյանը ընդգծեց. «Հեղափոխության ամենակարևոր ձեռքբերումներից մեկն այն է, որ Հայաստանում անցկացվեցին ազատ, արդար ընտրություններ, բացի այդ, մարդկանց մեջ հավատ է արթնացել սեփական երկրում առաջընթաց ունենալու և ապագան այստեղ տեսնելու հարցում, բազմաթիվ արատավոր երևույթներ այլևս չկան: Թաղային հեղինակությունները տարբեր հարցերում այլևս գործոն չեն»,- եզրափակեց Արմեն Փամբուխչյանը` հավելելով, որ, այնուամենայնիվ, նախկին համակարգից որոշ բաներ դեռ ամբողջությամբ փոխված չեն, դանդաղորեն են փոխվում, բայց կառավարության ծրագրերը և գործունեությունը միտված է հենց այդ դանդաղ տեմպի արագացմանը:

Սիլվի ՏԻԳՐԱՆՅԱՆ