Ֆեյքը ֆեյքով կայացավ, ԱԱԾ-ն տեսավ` զարմացավ

Այսօրվա թոփ թեման կառավարության նիստի ժամանակ վարչապետ Նիկոլ Փաշինյանի հայտարարությունն էր ֆեյքերի վերաբերալ: Փաշինյանը ԱԱԾ տնօրեն Արթուր Վանեցյանին հանձնարարեց զբաղվել ֆեյքերով մանիպուլյացիա ու կեղծ լուրեր տարածող օգտատերերով. «Այո՛, մեր երկրում խոսքի  և տեղեկատվության ազատությունը երաշխավորված է, բայց եթե որոշ հանցավոր շրջանակներ միլիոններ են ծախսելու սոցիալական ցանցերում, լրատվամիջոցներում հասարակական կարծիքի մանիպուլյացիաներ անելու համար, դա ազգային անվտանգության խնդիր է: Ես հույս ունեմ, որ ձեր ծառայությունը կկարողանա այս հարցում ապահովել կոնկրետ արդյունքներ»,- նշել է նա:

Համացանցի օգտատերերը սկսեցին քննարկել Փաշինյանի հերթական հայտարարությունը: Նրանց մի մասը, ըստ երևույթին չիմանալով անգամ, թե ինչ է ֆեյքը երկու ձեռքով կողմ էր վարչապետի ասածին, ինչպես ասում են «շեֆի ասածը օրենք է»: Զավեշտալին այն էր սակայն, որ անգամ սոցցանցում հայտնի ֆեյքերն էին ծիծաղաշարժ գրառումներ կատարում՝ ծաղրելով վարչապետին: 

Ֆեյսբուքյան օգտատերերի մի մասն էլ քննադատում էր վարչապետին՝ հիշեցնելով իր իսկ բազմահազար ֆեյքերի մասին, որոնք մեղրածոր մեկնաբանություններ են շաղ տալիս նրա հրապարակումների տակ: Հարց է առաջանում՝ Փաշինյանն իր ֆեյքերի դեմ է՞լ է պայքարելու, որոնք զօր ու գիշեր ջանք ու եռանդ չեն թափում նրան գովերգելու համար: Նշենք, որ այսօր ԼՈւՐԵՐ.com-ն անդրադարձել էր իշխանությանը սատարող ֆեյք օգտատերերին՝ նշելով, որ հանրային բարձր աջակցության իմիտացիա ստեղծելու համար Նիկոլ Փաշինյանը կամ իր կողմնակիցները ստեղծել են 2000-ից ավել կեղծ հաշիվներ:

Մարդկանց մոտ զայրույթ էր առաջացրել հատկապես հեղափոխության հարթակից հանդես եկած ֆեյք տարեցի մասին հիշողությունը, ով ներկայացրել էր Ապրիլյան պատերազմի հերոս Ռոբերտ Աբաջյանի պապիկ, սակայն այդպես էլ չպատժվեց, քանի որ սատարում էր հեղափոխականներին: «Օրինակները շատ են, բայց այս մեկն ամենազարհուրելին է, ախր դո՞ւք չէիք, որ կանգնած էիք հերոս Ռոբերտ Աբաջյանի ֆեյք պապիկի կողքը, ով ստում էր, թե իբր Կյաժի պապն է ու ձեր քաղաքական ջրաղացին ջուր էր լցնում»,- գրել է ֆեյսբուքի օգտատերերից մեկը:

Օգտատերերից ոմանք էլ վարչապետին հորդորում էին լավ նայել «կողուկուշտը»՝ վստահ լինելով, որ լավ նայելու դեպքում հաստատ ֆեյքեր կգտնվեն: