Պատերազմի, նոր տարածքների մասին խոսելու ժամանակը չէ․ Կոմանդոս

«Ես չեմ հասկանում, թե ինչի մասին է Պաշտպանության նախարարի հայտարարությունը, խաղաղությա՞ն, պատերազմի՞: Կներեք, բայց չեմ հասկանում։ Նախարարությունը հրաման կատարող է, ինչ հրաման տան՝ պետք է կատարի, ասեն առաջ՝ ուրեմն առաջ»,-այս մասին ԼՈՒՐԵՐ․com-ի հետ զրույցում ասաց ՀՀ ԶՈՒ գեներալ-մայոր, ՀՀ պաշտպանության նախկին փոխնախարար Արկադի Տեր-Թադևոսյանը (Կոմանդոս), խոսելով ՀՀ պաշտպանության նախարար Դավիթ Տոնոյանի այն հայտարարության մասին, թե տարածքներ խաղաղության դիմաց ձևաչափը վերաձևակերպել է՝ «նոր պատերազմ՝ նոր տարածքների դիմաց»։

«Մենք պետք է հասկանանք՝ ով ենք մենք, ունենք բանակ, որը կարող է պաշտպանել մեզ, ու մենք կարող ենք խաղաղություն բերել այդ բանակով, մեր ունեցած տարածքներով։ Ասել, որ նոր հողեր կվերցնենք՝ մեզ համար շատ հաճելի է, բայց պատերազմի, նոր տարածքների մասին խոսելու ժամանակը չէ»,- նշեց նա։

Անդրադառնալով Փաշինյան-Ալիև հանդիպմանը, Կոմանդոսն ասաց, որ այդտեղ բացասական կողմ չկա․ «Այդ հանդիպումները թեև արդյունք չեն տալիս, բայց կարևորը խաղաղությունն է։ Մենք հասկանում ենք, որ թշնամին մեզ հետ բանակցում է, ուզում է իմանալ մեր վիճակը։ Երբ ասում ենք մեր բանակը, մենք կարող ենք պաշտպանվել, դա ռեալ է, և իրենք դա լավ հասկանում են։ Մենք ունենք ազգ, բանակ, կրոն, բայց իրենք չունեն բանակ, 8 մլն ժողովուրդ են, բայց տարաձայնություններ ունեն, լեզվական, կրոնական թշնամություն ունեն»,- ասաց նա։ 

Խաղաղություն տանող ճանապարհը բանակցությո՞ւնն է, թե՞ նոր պատերազմը հարցին ի պատասխան Արկադի Տեր-Թադևոսյանն ասաց․ «Պատերազմը մարդկային երևույթ չէ։ Ալիևը այն մարդն է, որը նստած է նավթի վրա, հարստությունն ունի և ինչպես բոլոր պետությունների ղեկավարներն են ասում, ասում է, թե ժողովրդի մասին են մտածում։ Ալիևն իր հռետորիկան է օգտագործում, թե պետք է հայերի վրա հարձակվեն, բայց իրենք հասկանում են՝ մեզ վրա հարձակվելու դեպքում մենք կկրակենք, ինքը կպայթի այդ նավթի վրա։ Իմ կարծիքով, իրենք մեր ժողովրդին են վախեցնում, բայց Ալիևը ոչ մի անգամ պատերազմ չի անի։ Մենք վստահաբար ասում ենք, որ պատերազմ չենք ուզում, իսկ Ադրբեջանն ասում է, որ կարող է կռիվ անել, բայց մենք գիտենք, որ չեն կարող. նախ թույլտվություն պետք է վերցնեն Թուրքիայից և այլ պետություններից»,- նշեց Արկադի Տեր-Թադևոսյանը։ 

Սոնա Հարությունյան