Բարձրացնե՞լ տրանսպորտի սակագինը. իհարկե՝ ոչ

Օրեր առաջ Փոխադրողների միության նախագահ Հրանտ Եղիազարյանը հայտարարել էր, որ որոշ ավտոբուսներ և միկրոավտոբուսներ գործադուլ են սկսելու։

Պատճատը՝ սպառողի կողմից վճարվող 100 դրամն է, որը չի բավարարում ուղևորափոխադրողներին: Հրանտ Եղիազարյանի խոսքով՝ ամեն ինչ թանկացել է, ուղեվարձը մնացել է նույն 100 դրամը, «որն այսօր «կատաստրոֆա» է առաջացնում», սակագինը պետք է կամ թանկացնել, կամ աշխատել պետության կողմից տրվող դոտացիայով:

Թեմայի շուրջ ԼՈՒՐԵՐ.com-ը զրուցել է Տրանսպորտի, կապի և տեղեկատվական տեխնոլոգիաների նախկին փոխնախարար, Աժ «Իմ քայլը» խմբակցության պատգամավոր Արմեն Փամբուխչյանի հետ։

Մեր հարցին, թե նախատեսվում է արդյոք հասարակական տրանսպորտի վճարը ավելացնել, պատգամավորը պատասխանեց՝ «Այդ տեսանկյունից, որևէ փոփոխություն անելուց առաջ, պետք է ուսումնասիրություններ կատարել, ճիշտ հաշվարկներ անել և հասկանալ, թե ի՞նչ տրանսպորտային միջոցներ են, ի՞նչ եղանակով են ձեռք բերվել՝ պետության միջոցներով, թե՝ մասնավոր։ Տարբեր մոտեցումներ և տարբերակներ կան, հաշվի առնելով համաշխարահին փորձը՝ օրինակ՝ երբ վճարումը կատարվում է՝ կախված հեռավորությունից, միասնական է, թե ներշրջանային, ինչ որակի սպասարկում են առաջարկում տրանսպորտային միջոցները։ Սրանք տարբեր մոտեցումներ են, որոնք պետք է քննարկվեն»։

Արդյո՞ք ներկայիս տրանսպորտային միջոցները ունե՞ն այն որակները, որոնց համար պետք է բարձրացվի սակագինը, Փամբուխչյանը պատասխանեց՝ «Իհարկե ոչ, իմ սուբյեկտիվ կարծիքով, այս պահին չկա տրանսպորտային այն ծառայությունը, որի համար գնի փոփոխություն արվի։ Հարցի լուծումը պետք է լինի ընդհանուր քննարկումը։ Ինչպես արդեն նշեցի, պետք է հասկանալ՝ ի՞նչ տրանսպորտային միջոց է ներդրվում, ի՞նչ ծախսեր է հետապնդում և որքա՞ն պետք է վճարի քաղաքացին։ Ես իմ մասով պատրաստ եմ մի փոքր ավել վճարել՝ լավ տրանսպորտային միջոցներ ունենալու համար։ Պետք է հանրային լսումներ անցկացնել, որպեսզի փոփոխությունները ինչ-որ չափով ընդունելի լինեն բոլորի համար»,-ասաց Փամբուխչյանը։

Հիշեցնենք, որ Երևանի քաղաքապետարանն արձագանքել է և հայտնել, որ առաջարկները կքննարկվեն։