Հանցագործության մասին հայտարարություն եմ տալիս. գազի սակագինը կոռուպցիոն սխեմաներով է հաստատվում. տնտեսագետ

ԼՈՒՐԵՐ․com-ի զրուցակիցն է տնտեսագետ Մովսես Արիստակեսյանը:

-Պարո՛ն Արիստակեսյան, կան տվյալներ, որոնք փաստում են, որ Հայաստանի և Ռուսաստանի միջև ապրանքաշրջանառությունը նվազել է։ Ի՞նչը կարող է լինել դրա պատճառը։

-Ես այն կարծիքին եմ, որ ԵԱՏՄ համագործակցությունը նորմալ, մրցակցային համագործակցություն չէ։ Այնտեղ ավելի շատ կա մրցակցություն, քան համագործակցություն։ Հակասությունները պայմանավորված են քաղաքական դիվիդենտներ շահելու, քաղաքական կողմնորոշումների շրջանակներում։ Միությունն ավելի շատ նպաստավոր է թուրքալեզու պետությունների համար, դրանց շահերը պաշտպանելուն է ուղղված։ Այսինքն, կա անհավասարություն և տնտեսական նորմերին չհամամապատասխանող համագործակցություն։ Խնդիր է նաև այն, որ անհեթեթ է դառնալ այդ միության անդամ, քանի դեռ ընդհանուր սահման չունենք։ Մեզ կապող սահմանը Վրաստանի հետ է, որն այլ համակարգի մեջ է։ Հայաստանի համար բոլորովին շահեկան չէ համագործակցել այս միության հետ, ավելին՝ մաքսային և աքցիզային հարկերի քաղաքականությունը բերում են մեծ տնտեսական վնասների։

-Կարելի՞ է կարծել, որ վերջերս Հայաստանում տեղի ունեցած ԵԱՏՄ նիստը կտա դրական արդյունք և կվերականգնվի նախորդ տարվա ապրանքաշրջանառության ցուցանիշները։

-Այդ շրջանառության մի քիչ ավելանալը, մի քիչ պակասելը բնութագրական չէ։ Բնութագրական է տնտեսական միջավայրը և ազնվությունը գործընկերների հետ։ Ակնհայտորեն Ռուսաստանը ճնշող դերակատարում ունի։ Հավասար պայմաններ չեն, մրցակցություն չկա, միջավայրը թշնամական է։ Այս պարագայում, չեմ կարծում, որ շրջանառությունը կմեծանա, որովհետև համակարգը կոռումպացված է, երկրները՝ ավտորիտար։ Մինչև չլինեն քաղաքական փոփոխություններ, այլ փոփոխություններ չեն կարող լինել։

-Խոսվում է նաև Հայաստանի հեղափոխական իշխանության և ՌԴ-ի միջև լարվածության մասին: Դուք լարվածություն նկատե՞լ եք:

-Ես կարծում եմ, որ Հայաստանը պետք է օգտվի իր անդամակցությունից և իր իրավասություններից, ներկայացնի իր շահը և ոչ թե խնդրի։ Հակառակ դեպքում, դուրս գա համագործակցությունից և միանա Եվրամիության հետ։ ԵԱՏՄ-ն Հայաստանի համար  մեծ խոչընդոտ է առաջացնում այլ երկրների հետ հարաբերվելու հարցում։ Օրինակ, չենք կարողանում ազատ օգտվել Եվրամիության ծրագրերից։ ԵԱՏՄ շրջանակներում որևէ հեռանկար չեմ տեսնում։

-Ներկայիս իշխանությունները խոստանում էին, որ գազի գինը կիջնի, բայց կարծես փոփոխություններ չկան։ Հնարավո՞ր է գազի գնի փոփոխություն ակնկալել Փաշինյանի կառավարությունից:

-Կան տվյալներ, որոնք հասանելի չեն մեզ, դրա համար դժվար է կռահել՝ գնի փոփոխություն կլինի՞, թե՞ ոչ։ Հայաստանում գազը սահմանից բնակարաններ է հասնում կրկնակի գնով, մաքսիումում՝ պետք է լինի 20-30 տոկոս։ Հետևաբար, այդտեղ աշխատում են կոռուպցիոն սխեմաներ, հօգուտ գազ մատակարարող պետության և ադ պետության շահերը սպասարկած նախորդ իշխանությունների։ Սակայն, Նիկոլ Փաշինյանը ընտրություններից առաջ հայտարարեց, որ իշխանության գալուց հետո գազի և էլեկտրաէներգիայի գինը կիջնի 25 և ավել տոկոսով։ Չեմ կարող ասել, բայց այդ քաղաքական խոստումը չի կատարվում։ Իհարկե, այստեղ կա Ռուսաստանի քաղաքական մահակը՝ կապված Ազգային անվտանգության հետ։ Նիկոլ Փաշինյանի իշխանության սխալներից մեկն էլ այն է, որ Հանրային ծառայությունները կարգավորող հանձնաժողովի ղեկավար են դնում մի մարդու, ով տարիներ շարունակ սխալ է հաշվարկել և սակագին  հաստատել բնակչության համար։ Նախկինում նա եղել է ՀԾԿՀ սակագնային վարչության պետը, հիմա ղեկավարում է ՀԾԿՀ-ն։

Հանցագործության մասին հայտարարություն եմ տալիս, որ կոռուպցիոն սխեմաներով է հաստատվում գազի սակագինը Հայաստանի սահմանից դեպի Հայաստան։ Հատուկ ծառայությունները կամ պաշտոնյաները թող ստուգեն այդ կազմակերպության կողմից արված ծախսերը։