1 ցիստեռ ջուրը բնակիչներին վաճառում են 10.000 դրամով. ահազանգ Ձորաղբյուրից

Հասարակություն 6 Հուլիս, 2019 17:10

ԼՈՒՐԵՐ.com ահազանգած Ձորաղբյուրի մի խումբ բնակիչներ հայտնում են՝ «Նոր Հայաստանում» շարունակվում են «Հին Հայաստանի» հոռի բարքերը, Ձորաղբյուրի ամառանոցներում շաբաթներով ոռոգման ջուր չեն տալիս, իսկ այս արդեն 2 շաբաթ է՝ ոռոգման ջուր չկա. «Ակնհայտ է, որ ամռան տապին ոռոգման ջուր չտալը լրջագույն վնաս կարող է հասցնել ծառերին և թփերին: Սակայն, Ձորաղբյուրի ամառանոցներին ոռոգման ջուր հատկացնողներն (այսպես կոչված ՋՕԸ) ունեն ուրույն մտածելակերպ և այս իրավիճակն օգտագործում են բավական շահավետ բիզնես անելու նպատակով: Տարատեսակ պատճառաբանություններով հիմնավորելով շաբաթներով ջուր չտալը, նրանք այդ նույն ջուրը բնակիչներին վաճառում են ցիստեռններով: Այս ոչ բռնի, «թավշյա իրավիճակում» ամառանոցի բնակիչներին այլ ելք չի մնում, քան ցիստեռններով ջուր գնելը՝ սեփական այգին կործանումից փրկելու համար: 1 ցիստեռը կամ 7 տոննա ջուրը տաղանդավոր ձեռներեցները վաճառում են 10.000 դրամով: Ձորաղբյուրի ամառանոցների բնակիչները համոզված են, որ ոռոգման ջուր չտալը և այդ ջուրը թանկ վաճառելը հանցավոր սխեմայի դրսևորում է»,- ասում են նրանք՝ հրավիրելով Ջրային կոմիտեի և այլ պատկան մարմինների ուշադրությունը, որպեսզի պարզվի, թե ինչ է կատարվում:

ԼՈՒՐԵՐ.com-ի հետ զրույցում «Կոտայք» ջրօգտագործողների ընկերության գլխավոր ճարտարագետ Սեդրակ Մարտիկյանն ասաց, որ նախկինում ջուր չի եղել, բայց արդեն կա. «Մեր ջուրը գալիս է քառաստիճան համակարգից և 4 մղող «նասոսի» միջոցով ջուրը հասնում է Ձորաղբյուր: Եթե քառաստիճանի մեկ «նասոսը» վնասվում է, ունենում ենք վթար: Խնդիրը տարիների պատմություն ունի և խնդրի լուծումն այն է, որ քառաստիճան համակարգը հանվի: Մենք դիմելու ենք վարչապետին, որպեսզի աջակցի մեզ՝ քառաստիճան համակարգը շպրտենք, անցնենք այլ համակարգի»,- նշեց նա:

Անդրադառնալով ցիստեռով ջրի վաճառքին՝ Մարտիկյանը նշեց, որ ցիստեռներն իրենց հետ կապ չունեն. «Բնակիչները ճիշտ են նշում, դա մեր ցավն էլ է: Բոլոր խորքային հորերի բանալիներն իմ ձեռքում է և մենք ջուր վաճառող օբյեկտ ենք, մեզ ձեռնտու չէ, որ մեր ջուրը չկարողանանք վաճառել: Մենք մեր սեփական օգտագործման ենթակա մի հատ մեքենա, ցիստեռ չունենք, եկեք տեսեք՝ էդպիսի գույք չունենք: Դրանք էնքան են լկտիացել, որ հեռախոսահամարը մեծ տառերով գրել են ցիստեռների վրա, դե թող հեռախոսահամարներով գնան, ծայրը քաշեն՝ միանգամից կքանդվի՝ ով է կանգնած հետևում: Մեր անվան հետ են խաղում: Ես դիմել եմ իրենց, մեզանից փախնում են, վիճաբանություն էլ ենք ունեցել: Այլ լուծումներ են գտնում, գնում ուրիշ տեղերից՝ կաթի-մաթի գործարարներից, «զապռավկեք» են անում, դուրս գալիս: Ես ոստիակնություն կամ վերահսկողական ծառայություն չեմ, որ զբաղվեմ դրանով, հազիվ հասցնում եմ Սևանա լճից կամ այլ տեղերից Կոտայքի մարզն ապահովել ոռոգման համակարգով, գործս թողեմ, զբաղվեմ ոստիկանությունո՞վ: Ինձանով եմ փորձում հարցը լուծել, բայց բան չի ստացվում: Ես ոստիկանություն դիմելու ժամանակ չունեմ, գնում ձեռքով 40 ջերմաստիճանի տակ ջուր եմ բերում ,իրենց բաժանում»,- ասաց «Կոտայք» ջրօգտագործողների ընկերության գլխավոր ճարտարագետը:

Սոնա Հարությունյան