Առողջապահության նախկին փոխնախարարը գրավի դիմաց ազատ կարձակվի

Այսօր Երևան քաղաքի ընդհանուր իրավասության առաջին ատյանի դատարանը բավարարել է ՀՀ Առողջապահության նախկին փոխնախարար Արսեն Դավթյանի փաստաբաններ Տիգրան Ղազարյանի և Երեմ Դավթյանի միջնորդությունը՝ իրենց պաշտպանյանլի նկատմամբ ընտրված կալանքը գրավով փոխարինելու վերաբերյալ՝ գրավի չափ սահմանելով 15.000.000 ՀՀ դրամը։ 

Գումարը վճարելուց և դրա մասին ապացույցը վարույթն իրականացնող մարմին ներկայացնելուց հետո Արսեն Դավթյանը կազատվի կալանքից:

Նշենք, որ Արսեն Դավթյանը ԱԱԾ-ի կողմից ձերբակալվել է կաշառք ստանալու պահին, ապա մեղադրանք է առաջադրվել։ Նա առողջապահության փոխնախարար էր նշանակվել ՀՀ վարչապետ Նիկոլ Փաշինյանի որոշմամբ՝ 2018 թ․ մայիսի 23-ին, վարչապետի որոշմամբ էլ 2019թ․ ապրիլի 13-ին ազատվել է պաշտոնից:

Հիշեցնենք նաև, որ ԱԱԾ-ն հայտնել էր, թե ձեռնարկված լայնածավալ օպերատիվ-հետախուզական միջոցառումների և համալիր քննչական գործողությունների արդյունքում ձեռք են բերվել փաստական տվյալներ այն մասին, որ բժշկական հաստատության տնօրենը նպատակ է ունեցել ապահովել Առողջապահության նախարարության կողմից բուժհաստատություններին տրամադրվող ֆինանսավորման աշխատանքները համակարգող փոխնախարարի հովանավորչությունը և նրա հետ ձևավորել իր համար բարենպաստ աշխատանքային պայմաններ:

Վերաբաշխման արդյունքում պետպատվերի շրջանակներում տարբեր ծրագրերով հատկացվելիք գումարներով կազմակերպության ֆինանսավորման պակասը լրացնելու համար 2019 թվականի մարտի 30-ին առողջապահության նախարարի տեղակալին վերջինիս աշխատասենյակում որպես կաշառք անձամբ տվել է առանձնապես խոշոր չափերով գումար, որի փոխանցումն իրականացվել է ՀՀ ԱԱԾ աշխատակիցների օպերատիվ վերահսկողության ներքո:

Առերևույթ հանցագործության դեպքի առթիվ ՀՀ ԱԱԾ քննչական դեպարտամենտում հարուցվել է քրգործ ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 312-րդ հոդվածի 3-րդ մասի 1-ին կետով: