Իրանը միջուկային գործարքի շուրջ Թեհրանի և Փարիզի դիրքորոշումների մերձեցում է արձանագրել

Միջուկային գործարքի իրականացման շուրջ Թեհրանի և Փարիզի դիրքորոշումները մոտեցել են: Այդ մասին հայտարարել է Իրանի կառավարության ներկայացուցիչ Ալի Ռաբիին:

«Վերջին մի քանի շաբաթվա ընթացքում (Իրանի և Ֆրանսիայի) նախագահների միջև տեղի են ունեցել լուրջ բանակցություններ: Բարեբախտաբար բազմաթիվ հարցերի վերաբերյալ տեսակետները մոտեցել են»,- ասել է Ռաբիին, որի խոսքը մեջբերված է Իրանի կառավարության կայքում: Օգոստոսի երեսունմեկին երկու երկրների ղեկավարները՝ Հասան Ռոուհանին և Էմանուել Մակրոնը, հեռախոսազրույց են ունեցել, որի ընթացքում Իրանի նախագահը հայտարարել է, որ սեպտեմբերին Թեհրանի կողմից պլանավորված միջուկային պարտավորությունների կրճատման երրորդ փուլը շրջելի կլինի, ինչպես և նախորդ փուլերը:

Իրանը հայտարարել է 2015 թվականին կնքված գործարքով իր ստանձնած պարտավորությունների կրճատման մասին այն բանից հետո, երբ ԱՄՆ-ը դուրս եկավ համաձայնագրից և վերականգնեց պատժամիջոցները Թեհրանի նկատմամբ: Համաձայնագրի եվրոպացի մասնակիցները փորձում են պահպանել գործարքը: Վերջին մի քանի ամսում Իրանը և Ֆրանսիան ակտիվ քաղաքական երկխոսություն են վարում, մասնավորապես, տեղի են ունեցել Ֆրանսիայի նախագահի խորհրդականի այցերը Թեհրան, ինչպես նաև` մի շարք հեռախոսազրույցներ երկու երկրների նախագահների միջև, որոնց ընթացքում շեշտը դրվել է միջուկային գործարքի շուրջ ստեղծված իրադրության վրա՝ Թեհրանի կողմից դրա գծով պարտավորությունների կատարման կրճատման լույսով. կողմերը նաև փոխանակել են համաձայնագրի իրագործմանն ուղղված առաջարկություններ, հաղորդել է ՌԻԱ Նովոստին: