Ալիեւի հայտարարությունը նույնքան սիմվոլիկ է, որքան Փաշինյանի հայտարարությունը. Արտակ Զաքարյան

Ալիեւի հայտարարությունը «Վալդայ»-ում՝ թե «Ղարաբաղը Ադրբեջան է» նույնքան սիմվոլիկ է, որքան Փաշինյանի հայտարարությունը Ստեփանակերտում: Այս մասին իր ֆեյսբուքյան էջում գրել է Պաշտպանության նախկին փոխնախագահ Արտակ Զաքարյանը՝ ով իր գրառումը վերնագրել է.

«Հայտարարություն հայտարարության համար»:

Նա, մասնավորապես, գրել է․ 

«Որ Արցախը Հայաստան է եւ պետք է մնա այդպիսին, դա մեր համազգային նպատակն է: Եվ դրան պետք է հասնել ամեն գնով: Այն, որ այդ նպատակին հասնելու համար գոյություն ունի բանակցային միակ ձեւաչափ, դա եւս փաստ է, եւ պետք է բոլոր կողմերի պաշտոնական քաղաքական հայտարարություններն արվեն այդ տրամաբանության ներքո:

Ինքնորոշման իրավունքի սկզբունքը վաղուց ճանաչվել է ԵԱՀԿ ՄԽ համանախագահող երկրների ղեկավարների բոլոր համատեղ հայտարարություններում, եւ դրա մասին է պետք անընդհատ խոսել:

Հակամարտությանը տեղյակ գրեթե բոլոր քաղաքական գործիչները (ի նկատի ունեմ արտերկրում) չէին էլ կասկածում, որ խաղաղ լուծման տարբերակը հենց Արցախի Հանրապետության հայկական լինելու մեջ է: Սակայն դա միջազգայնորեն ամրագրելու համար դեռեւս պետք է ճանապարհ անցնել: Պատրազմը՝ ինչպիսին էլ այն լինի, միեւնույն է հարցի լուծում չէ: Հետեւաբար խաղաղ կարգավորման բանակցություններում պետք է ջանքեր գործադրել պահպանել ու զարգացնել ձեռքբերվածը:

Ալիեւի հայտարությունը «Վալդայ»-ում՝ թե «Ղարաբաղը Ադրբեջան է» նույնքան սիմվոլիկ է, որքան Փաշինյանի հայտարարությունը Ստեփանակերտում:

Մենք տեսնում ենք, որ նույնիսկ Փաշինյանի պացիֆիստական մոտեցումները՝ թե հիմնախնդրի լուծումը պետք է նաեւ ադրբեջանցիների համար ընդունելի լինի, Ադրբեջանում չեն գնահատում եւ համարժեք չեն արձագանքում: Ընդհակառակը՝ վերջին ժամանակներում էլ ավելի հաճախ են սկսել խոսել ռազմական ճանապարհի մասին:

ՌԴ, ԱՄՆ, Ֆրանսիա եւ Իրան: Ահա այս երկրների հետ ակտիվ, հասկանալի, հավասարակշռված ու կառուցողական հարաբերություններում է Արցախյան հարցի խաղաղ կարգավորման բանալին: Այլապես հակամարտության կողմերից հնչող ցանկացած հայտարարություն մյուս կողմերից անարձագանք չի մնալու:

Հիշեցնենք, որ Ադրբեջանի նախագահ Իլհամ Ալիևը հայտարարել էր, թե Արցախը Ադրբեջան է և վերջ: