«Ես քեզ խղճում եմ». Սերժ Սարգսյանը՝ Սերգո Կարապետյանին

24 Դեկտեմբեր, 2019 15:33

Irakanum.am-ին նոր մանրամասներ են հայտնի դարձել ՀՀ երրորդ նախագահ Սերժ Սարգսյանի եւ գյուղատնտեսության նախկին նախարար Սերգո Կարապետյանի առերեսումից։

Առերեսումը, որը տևել է շուրջ 2 ժամ, Սերգո Կարապետյանը մշտապես հայացքը թեքել է Սերժ Սարգսյանից։ Մեր աղբյուրների փոխանցմամբ Սերժ Սարգսյանը Սերգո Կարապետյանին հարցրել է։ «Սերգո, ես նման բան քեզ ասե՞լ եմ»: Հիշեցնենք․ նախկին գյուղնախարարը ցուցմունք է տվել, որ Սերժ Սարգսյանի ցուցումով է գյուղերին դիզվառելիք տրամադրելու տենդերը տվել Ֆլեշի Բարսեղին, չնայած ավելի ցածր գին առաջարկող է եղել։

Սերգո Կարապետյանը ի պատասխան հայտարարել է, թե ինքը հավատացյալ մարդ է, որից հետո հնչել է Սերժ Սարգսյանի հաջորդ հարցադրումը։ «Բա որ հավատացյալ մարդ ես, ինչո՞ւ ես իմ ապօրինի հրահանգը կատարել եւ պետությանը վնաս պատճառել, Սերգո»։ Վերջինս այս հարցին պատասխան չի ունեցել, որից հետո Սերժ Սարգսյանը նայելով դեպի Կարապետյանը պարզապես ասել է. «Ես քեզ խղճում եմ»։

Ի դեպ մեզ առերեսումից նաև ուշագրավ դրվագ է հայտնի դարձել Գործը քննող քննիչը առեերսումից հետո շնորհակալություն է հայտնել Սերգո Կարապետյանին։ Այս հանգամանքը չի վրիպել Սերժ Սարգսյանի ուշադրությունից, սակայն քննիչը փորձել է իր վրիպակը արագ ուղղել։

Հիշեցնենք՝ դեկտեմբերի 4-ին ՀՔԾ-ն հայտարարեց, որ իրենց վարույթում քննվող դիզվառելիքի վերաբերյալ քրեական գործի նախաքննության ընթացքում ձեռք բերված բավարար ապացույցների համակցության հիման վրա Սերժ Սարգսյանին մեղադրանք է առաջադրվել վատնման եղանակով առանձնապես խոշոր չափի՝ մոտ կես միլիարդ ՀՀ դրամի հափշտակություն կազմակերպելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Ըստ մեղադրանքի՝ 2013 թվականի հունվարի 24-ի որոշմամբ ՀՀ կառավարությունը հաստատել է ՀՀ հողօգտագործողներին 2013 թվականի գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագիրը, որի շրջանակներում նախատեսվել է ՀՀ մարզպետարանների և ՀՀ գյուղատնտեսության նախարարության համակարգի կազմակերպությունների կողմից ներկայացված հայտերի հիման վրա հողօգտագործողներին վաճառել 17.041.300 լիտր դիզելային վառելիք: Ծրագրի շրջանակներում մատակարարում իրականացնելու պատրաստակամություն են հայտնել մի շարք, այդ թվում՝ «Մաքսհուր» և «Ֆլեշ» ՍՊ ընկերությունները: