Հրդեհների թվի աճը կազմել է շուրջ 55 տոկոս

Հրդեհների թվի աճը համաշխարհային միտում ունի՝ կապված գլոբալ տաքացման հետ, սակայն մեծ է մարդածին գործոնների ազդեցությունը: Դեկտեմբերի 25-ին լրագրողների հետ զրույցում այս կարծիքը հայտնեց ՀՀ արտակարգ իրավիճակների նախարարության փրկարար ծառայության տնօրեն Վրեժ Գաբրիելյանը՝ ներկայացնելով Հայաստանում հրդեհային իրավիճակի մասին վիճակագրություն:

«Եղանակային անոմալիաները դեկտեմբերի սկզբից Հայաստանում, հատկապես խոտածածկ տարածքներում, հրդեհներ են առաջացնում: Անցած տարվա համեմատ այս տարի հրդեհների թվի աճը կազմել է 54,6 տոկոս կամ 3574-ով ավելի»-, շեշտեց Գաբրիելյանը։

Արտակարգ իրավիճակների նախարարության փրկարար ծառայության տնօրենը նշեց, որ մարզերում տարածված դաշտային չոր խոտի այրումը ոչ միայն վտանգավոր է, այլև արգելված է օրենքով: «Առաջացող հրդեհների մոտ 65 տոկոսը լինում է խոտածածկ և անտառային տեղանքում։ Եթե անգամ չկա առաջացման մարդկային գործոն, ապա մեղքի մեծ բաժին ունեն տեղական պատասխանատուները, որոնք չեն վերահսկում իրավիճակը և ժամանակին չեն կատարում կանխարգելիչ աշխատանքներ։ Նրանք պետք է ձեռնարկեն բոլոր անհրաժեշտ միջոցները, որպեսզի թույլ չտան նման հրդեհավտանգ իրավիճակների առաջացումը»,- ընդգծեց Գաբրիելյանը: ՀՀ արտակարգ իրավիճակների նախարարության փրկարար ծառայության տնօրեն հորդորեց խուսափել չոր խոտ և տերևներ կուտակելուց, չայրել դրանք: Ըստ Գաբրիելյանի՝ ոստիկանության հետ համատեղ արտակարգ իրավիճակների նախարարությունը կփորձի առաջիկա օրերին հնարավորինս կանխել մարդկանց մուտքը անտառներ, առավել ևս՝  արգելել խարույկները վտանգավոր վայրերում: