Իրանն ԱՄՆ-ից վրեժ լուծելու 13 սցենար է մշակել. փոխծովակալ Շամխանի

Իրանի Ազգային անվտանգության բարձրագույն խորհրդի քարտուղար, փոխծովակալ Ալի Շամխանին երեքշաբթի հայտարարել է, որ Իրանը մշակել է վրեժխնդրության 13 սցենար, «որոնցից ամենամեղմը ԱՄՆ-ին մղձավանջ կթվա», հայտնում է Mehr-ը: 

«Ամերիկացիները պետք է իմանան, որ մինչեւ այսօր մենք մշակել են մեր դաժան վրեժխնդրության 13 սցենար, եւ նույնիսկ դրանցից ամենամեղմի իրագործման դեպքում դա Միացյալ Նահանգների համար մղձավանջ կդառնա»,- ասել է Շամխանին:

Շեշտելով գեներալ Ղասեմ Սոլեյմանիի սպանության համար ԱՄՆ լիակատար պատասխանատվությունը՝ փոխծովակալը հայտնել է, որ Իրանը հետեւում է տարածաշրջանում ամերիկյան շտաբներին ու բազաներին եւ տեղեկություններ ունի զինծառայողների ու սպառազինության թվաքանակի մասին:

«Ամերիկացիները գիտեն, որ իրենք խոցելի են, այս պատճառով իրենց մարտավորությունը փոխել են՝ ուժերը հավաքելով եւ կենտրոնացնելով իրենց բազաներում»,- նշել է փոխծովակալը:

Նա ընդգծել է, թե Իրանը ցանկանում է, որ ԱՄՆ ԶՈՒ-ն տարածաշրջանից հեռանա, քանի դեռ չի թիրախավորել նրանց բազաները:

«Ցանկանո՞ւմ եք իմանալ ամերիկյան ուժերի նշանակությունը, որ հավաքվել են տարածաշրջանի իրենց ապաստարաններում: Պատասխանը հստակ է՝ նրանք թաքստոցներում են փակվել՝ մեր վրեժխնդրությունից խուսափելու հույսով, բայց Իսլամական Հանրապետությունը նրանց համար դժոխքի դռներն է բացում»,- հայտարարել է Շամխանին:

Փոխծովակալը պատասխանել է ԱՄՆ-ի եւ Իրանի միջեւ պատերազմի հավանականության մասին հարցին, որի դեպքում ԱՄՆ-ն կարող է թիրախավորել նավթամշակման կետերը:

«Մենք առաջին անգամ չենք բախվում կովբոյների այդպիսի հիմար սպառնալիքներին, բայց ահաբեկիչն առաջին անգամ սարսափելի քայլ է կատարում եւ շարունակում է սպառնալ»,- ասել է նա:

«Ամերիկացիները 40 տարի շարունակ որոնում են Իրանում իրենց կորցրած շահերը, եւ նրանք պատերազմ են ցանկանում, բայց Թաբասի մասին դառը հիշողությունները նրանց հետ կպահեն իրենց սխալը կրկնելուց»,- շեշտել է փոխծովակալը:

«Իսլամական Հանրապետության ուղերձը հստակ է: ԱՄՆ-ն սպանել է ազգային հերոսին, եւ մենք չենք կարող անտարբեր մնալ: Ուստի եթե ԱՄՆ ԶՈՒ-ն տարածաշրջանից ինքնակամ չհեռանա, մենք նրանց դին ենք վտարելու»,- ասել է Շամխանին:

Նա հավելել է, որ բոլորին հայտնի է «Ալ Ղուդս» ստորաբաժանման ռազմավարական կարեւորությունը, եւ «ԱՄՆ եվրոպական դաշնակիցները՝ Գերմանիան, Ֆրանսիան եւ Իսպանիան Իրաքից իրենց զորքերը դուրս են բերում Թրամփի հիմար որոշման պատճառով չվճարելու համար»: