ՊԵԿ նախագահը ստո՞ւմ է․ կան մեքենաներ, որոնք չեն մաքսազերծվել

Երեկ հրավիրված մամուլի ասուլիսի ժամանակ Պետական եկամուտների կոմիտեի նախագահ Դավիթ Անանյանը, չնայած ավտոներկրողների բողոքներին, ամպագորգոռ հայտարարություն արեց՝ նշելով, որ նախորդ տարի բոլոր մեքենաները հասցրել են մաքսազերծել։ Հայտարարությունից հետո, այսօր ՊԵԿ-ի դիմաց են հավաքվել ավտոներկրողները՝ բողոքելով, որ անկախ իրենցից, կանգնել են փաստի առաջ։

«Թյուր տեղեկատվություն է ՊԵԿ նախագահի կողմից, որ մինչև 2019թ․ դեկտեմբերի 31-ը հասցրել են բոլոր մեքենաները մաքսազերծել։ Չկա նման բան»,- հայտարարեց ավտոներկրողներից մեկը։ 

Նկատենք, որ ՊԵԿ աշխատակիցն իր խոսքում ևս կասկածի տակ դրեց Անանյանի հայտարարությունը՝ նշելով, որ կան մեքենաներ, որոնք մինչև նախորդ տարեվերջ չեն հասցրել մաքսազերծել։ Անդրադառնալով հարցին, թե քանի՞ մեքենա նախորդ տարվա վերջ չի հասցրել մաքսազերծվել, ՊԵԿ աշխատակիցը նշեց․ «Թվով չեմ կարող նշել, թե քանի մեքենա չի մաքսազերծվել, բայց կան մի քանի պատճառներ․ դիմել են մաքսային միջնորդների, նրանց մոտ հերթեր են եղել, չեն հասցրել նախնական հայտարարագիր ներկայացնել, հայտարարագիր ներկայացրել են Բագրատաշենի մաքսակետում տարանցման հայտարարագիրը, սակայն ինչ-ինչ պատճառներով չեն ներկայացրել վերջնական հայտարարագիրը այն փուլում, որտեղ պետք է իրականացվեր մաքսային ձևակերպումները։ Դրույքաչափերը ֆիքսվում են վերջնական փուլում, տարանցման հայտարարագիրը բավարար չէ, որ դրույքաչափերը ֆիքսեն»,- նշեց նա։ 

Ավելի վաղ, ԼՈՒՐԵՐ․com ահազանգած աջ ղեկով մեքենաներ ներկրողները հայտնել էին, որ իրենք հասցրել են սահմանված ժամկետում բերել մեքենաները, սակայն բրոքերները, որոնք զբաղվում են փաստաթղթավորությամբ հրաժարվել են աշխատել իրենց հետ ծանրաբեռնվածության պատճառով։ Արդյունքում, մոտ 1000 աջ ղեկով ավտոմեքենա չի մաքսազերծվել 2019-ին, ինչի հետևանքով 2020 թվականին, օրենքի փոփոխությամ պայմանավորված՝ ստիպված են 5-6 անգամ ավել գումար վճարել մաքսազերծելու համար։