2022 թվականից կարգելվի պոլիէթիլենային տոպրակների օգտագործումը

Հայաստանում պոլիէթիլենային տոպրակի օգտագործումը կարգելվի 2022 թվականի հունվարի 1-ից՝ սակայն որոշ բացառություններով: Հրավիրված ասուլիսում Շրջակա միջավայրի նախարարի տեղակալ Իրինա Ղափլանյանը նշեց, որ բացառության մեջ մտնելու են կշռափաթեթավորման համար նախատեսված տոպրակները, որոնք չունեն բռնակներ, աղբի համար նախատեսված տոպրակները, որոնք արտադրվում են երկրորդային հումքից: Այլընտրանքը լինելու են թղթից, կտորից պատրաստված տոպրակները:

«Մենք այս ընթացքում ակտիվ աշխատում ենք բոլոր շահագրգիռ կողմերի հետ: Քննարկումներ ենք ունեցել տոպրակ արտադրողների, ռեստորանների, խանութների ղեկավարների, հասարակական կազմակերպությունների ներկայացուցիչների հետ: Ներկայացրել ենք ծրագրի մանրամասները: Արգելքի մեկնարկից երկու տարի առաջ ենք սկսել իրազեկումը, որպեսզի արտադրողները կարողանան իրենց աշխատանքները վերանայել, արտադրանքի ծավալները սպառել»,- ասաց Իրինա Ղափլանյանը:

Նախարարության բնապահպանական ռազմավարական ծրագրերի ու մոնիթորինգի վարչության պետ Լուսինե Ավետիսյանը տեղեկացրեց, որ տարեկան Հայաստանում մեծ ծավալի պոլիէթիլենային տոպրակ է շրջանառվում: Արգելքի ուժի մեջ մտնելուց հետո ակնկալվում է շրջանառությունից դուրս բերել տարեկան 4 հազար տոննա պոլիէթիլենային տոպրակ:

«Այսինքն՝ պատկերացրեք, թե ինչ ծավալի մասին է խոսքը: Պոլիէթիլենային տոպրակները, որոնք դառնում են թափոն, տարիներ շարունակ չեն քայքայվում, ինչն էլ վատ հետևանքներ է ունենում մեր միջավայրի վրա: Ասեմ, որ այս փոփոխությունը սպառողի համար հավելյալ բեռ չի լինելու, պոլիէթիլենային տոպրակներին այլընտրանք առաջարկվելու է»,-ասաց Լուսինե Ավետիսյանը:

Նախարարությունն ակտիվ իրազեկման աշխատանք է տանելու հանրության շրջանում, որպեսզի մարդիկ լավ պատկերացնեն, թե պոլիէթիլենային տոպրակները, պլաստիկը ինչ բացասական ազդեցություն են թողնում մարդու առողջության, շրջակա միջավայրի վրա:

«Պոլիմերային արտադրանքը չի քայքայվում հարյուրավոը տարիներ, այն մտնում է սննդային շղթա: Մի քանի հետազոտություններ ցույց են տվել, որ ծովամթերքում առկա է միկրոպլաստիկ: Վերջերս Գերմանիայում հետազոտություն է կատարվել և պարզվել է, որ նույնիսկ գարեջրում առկա է միկրոպլաստիկ: Գիտենք, որ գարեջրի արտադրության մեջ բավական բարձր ֆիլտրացիայի համակարգեր են ներդրված, և եթե միկրոպլաստիկն անցնում է այս արտադրության մեջ, ապա պետք է հասկանալ, որ պլաստիկի սննդային շղթա ներթափանցումը շատ վտանգավոր է»,-ասաց Իրինա Ղափլանյանը:

Շրջակա միջավայրի նախարարությունը պատրաստվում է առաջիկայում իրազեկման մեծ աշխատանքներ տանել սոցիալական գովազդների, տեղեկատվական նյութերի, առանձին հաղորդումների օգնությամբ, սոցիալական ցանցերում ևս ակտիվ գործելու են, կազմակերպելու են տեղեկատվական արշավներ:

Պոլիէթիլենային տոպրակները շրջանառությունից դուրս բերելն առաջին քայլն է: Շրջակա միջավայրի նախարարությունը քննարկում է այլ նախաձեռնություններ ևս: Մասնավորապես, դիտարկվում է «վճարի ետվերադարձի համակարգ»-ի ներդրումը: Ի՞նչ է այն իրենից ենթադրում: Պլաստիկից, ալյումինից, ապակուց պատրաստված շշերը ենթակա են վերամշակման: Զարգացած երկրներում գործում է մի համակարգ, երբ առևտրի կենտրոններում տեղադրված են սարքեր, որոնք ընդունում են այդ տարաները, իսկ դրա դիմաց քաղաքացուն տալիս են կտրոններ, որոնք կարող են սուպերմարկետում օգտագործել:  Ներկայում հետազոտություն է կատարվում՝ հասկանալու, թե ինչ կարգավորումներ պետք է իրականացվեն: