ՀՔԾ քննիչը պաշտոնական կեղծիքի միջոցով իմ կողմից տրված պատասխանները կտրել է տրամաբանությունից․ Սամսոնյան

Գործի քննությունը բավականին խայտառակ շրջադարձ ունեցավ վերջին րոպեին։ Այս մասին այսօր՝ հունվարի 31-ին, լրագրողների հետ զրույցում ասաց «Քաղաքացիական գիտակցություն» ՀԿ նախագահ Նարեկ Սամսոնյանը՝ հավելելով, որ «սև իկռայի» գործի մասին էր խոսքը։

«Նախ ես չեմ ստորագրել որևէ փաստաթուղթ նախաքննական գաղտնիքի մասին։ Ըստ էության չէինք սխալվում՝ այն գործն էր, որի մասին խոսում էինք։ ՀՔԾ-ն հասատատեց իմ կողմից հաստատած բոլոր տեղեկությունները։ Հարցաքննություն իրականացվում էր ՀՔԾ քննիչ Լեռնիկ Ստեփանյանի կողմից, իսկ հարցաքննության ամբողջ ընթացքը վերահսկվում էր Սասուն Խաչատրյանի կողմից իմ խորին համոզմամբ։ Հարցերի պատասխանների ընթացքում  ես տալիս է շատ կոնկրետ պատասխաններ, քննիչը պարտավոր էր արձանագրել իմ պատասխանները, ինչ-որ պահից քննիչը դուրս եկավ սենյակից, մոտավորապես 7- 10 րոպե բացակայեց սենյակից, ինչից հետո քննիչը եկավ նոր հարցերով, որոնց տվեցի այն պատասխանները, որոնք նախկինում տվել է, այսինքն ես ավելացնելու բան չունեի և չավելացրեցի, ինչից հետո քննիչն ավարտեց հարցաքննությունը, որից հետո մենք վերցրեցինք թուղթը, որ ծանոթանանք իմ ցուցմունքի հետ, պարզվեց՝ քննիչը պաշտոնական կեղծիքի միջոցով իմ կողմից տրված պատասխանները արձանագրել էր սկզբում, վերջում ջնջել, նոր տպել էր։ Քննիչ Լեռնիկ Ստեփանյանը իմ խոսքերը հեռացրեց, կտրեց իմ պատասխանի տրամաբանությունից»,-նշեց Սամսոնյանը։

Նրա խոսքով՝ քննիչը հեռացրել է այն հատածը, որտեղ ինքը պնդել է,որ Սասուն Խաչատրյանը քաղաքական գործունեությամբ է զբաղվում և ինքը արժանահավատություն չունի ՀՔԾ-ի նկատմամաբ։

Սամսոնյանը սա հերթական քաղաքական հետապնդումը համարեց և պնդեց, որ Նիկոլ Փաշինյանի կողմից է այն ղեկավարվում։

Հիշեցնենք, որ Նարեկ Սամսոնյանը ավելի վաղ ֆեյսբուքյան իր էջում գրել էր․ «Ուրեմն «գրիչի գնից ապշած» վարչապետի միջնեկ աղջիկը, հոր` վարչապետ դառնալուց հետո շատ շատ ա հավանել սև իկռան: Ու դե քանի որ մեր Վարչապետն էլ ալամ աշխարհի գերագույն գլխավոր խմբագիրն ա, երեխու խաթրը չի կարողանում կոտրել ու տենց երևանյան ռեստորաններից մեկից (ռեստորանի անունը հատուկ չեմ տալիս դեռ) հաճախակի 1 կիլոգրամը 3 հազար դոլարով մեր «սուրբ» Նիկոլը երեխու համար իկռա ա առնում:

Տենց 2019-ի դեկտեմբերի սկզբին հերթական 3.000 դոլարանոց ուտելիքն են առնում ու ամսվա վերջում երեխեն էդ մի կիլոյի գլուխը կերած ա լինում: Ախռանայի տղերքը գնում են էդ ռեստորան ու նորից նույն չափ սև իկռա են ուզում, բայց ասում են «էս անգամ փոխանցումով առնենք էլի», ռեստորանի ադմինիստրացիան ասում ա, որ փոխանցումով առնելու դեպքում 3 հազարի փոխարեն 5 հազար դոլար կլինի կիլոգրամը: Ու էս մեր «սրբության սրբոց» վարչապետն իմանում ու ջղայինանում ա և որոշում ա տվյալ ռեստորանին հարկայինով պատժել հենց տեղում»: