«Օրսիս Արմս»-ի ներկայացուցչի հաղորդման հիման վրա հարուցված նոր քրգործը միացվել է նախորդին․ ՀՔԾ
Իրավունք
Ինչպես արդեն տեղեկացրել ենք՝ «Օրսիս Արմս»-ի գործով նոր քրեական գործ է հարուցվել։ ԼՈՒՐԵՐ․com-ի հետ զրույցում Հատուկ քննչական ծառայությունից հայտնեցին, որ ռուսական հրաձգային զինատեսակներ արտադրող «Օրսիս Արմս» ընկերության ներկայացուցչի հաղորդման հիման վրա նոր հարուցված քրեական գործ և միացվել է «Օրսիս Արմս»-ի զենքի գնման պայմանագրի չեղարկման դեպքով հարուցված քրեական գործերին:
«Այդ քրեական գործը միացվել է «Օրսիս Արմս» ընկերության զենքի գնման պայմանագրի չեղարկման դեպքով հարուցված քրեական գործերին»,- ասացին ՀՔԾ-ից՝ հավելելով, որ այս պահին այլ մանրամասներ չեն կարող հայտնել:
Նշենք, որ հարուցվել է քրեական գործ ՀՀ ՊՆ ղեկավար աշխատողների կողմից խոշոր չափերով յուրացում և նույն նախարարության պաշտոնատար անձի կողմից փաստաբանի լիազորությունների իրականացմանը խոչընդոտելու վերը նշված դեպքերի առթիվ ՀՀ քրեական օրենսգրքի 179-րդ հոդվածի 2-րդ մասի 3-րդ կետով և 332/3-րդ հոդվածի 1-ին մասով։ Որոշումն ուղարկվել էր ՀՀ գլխավոր դատախազության ՀՔԾ-ում մինչդատական վարույթի օրինականության նկատմամբ հսկողության վարչություն։
Պարզվել էր, որ «Օրսիս Արմս» ընկերության և Պաշտպանության նախարարության միջև քաղաքացիական դատավարության շրջանակներում քննվող 2 դատական գործի ընթացքում Պաշտպանության նախարարի տեղակալի օգնականը սկսել է հեռախոսազանգեր և հանդիպումներ ունենալ «Օրսիս Արմս» ընկերության փաստաբան Ալեքսանդր Սիրունյանի հետ, որոնց ընթացքում համոզել և հորդորել է վերջինիս հրաժարվել տարբեր իրավապահ մարմիններին ներկայացրած բողոքներից։
Բացի այդ, ընկերության կողմից՝ ի նշան համագործակցության, ՊՆ-ին նվիրաբերած իտալական MAROCCHI SI 12 տեսակի որսորդական հրացանը ՊՆ հաշվեկշիռ չի հանձնվել, այլ յուրացվել է՝ գրանցվելով պաշտպանության նախարարի տեղակալի անունով։
Հիշեցնենք՝ Հայաստանում քրեական գործ էր հարուցվել զենքի մատակարարման մրցույթի չեղարկման փաստի առթիվ։ Մի քանի միլիոն դոլար բյուջե ունեցող մրցույթը հայտարարվել էր մայիսին, պահանջներին բավարարել էր միայն ռուսական ORSIS ընկերությունը։ Սակայն ավելի ուշ պարզ էր դարձել, որ մրցույթը չեղարկվել է՝ առանց պատճառների մասին բացատրություն տալու։ Ավելին, վերջերս Երևանի ընդհանուր իրավասության դատարանը բավարարել էր ORSIS ընկերության ներկայացուցիչների միջնորդությունը և կասեցրել Ֆինանսների նախարարության որոշումը, ըստ որի՝ ORSIS-ը պետք է ներառվի «սև ցուցակում» և իրավունք չունենա մասնակցելու պետական գնումներին: Սակայն օրեր առաջ հայտնի դարձավ, որ Հայաստանին զենք մատակարարող ORSIS-ը հանվել է սև ցուցակից և իրավունք ունի մասնակցելու մրցույթների ու մատակարարումներ իրականացնել ՀՀ ուժային կառույցներին:
Սոնա Հարությունյան
ՈՒՂԻՂ ԵԹԵՐ
Ամենադիտված 
Ո՞րն է սիրված արտիստ Արտաշես Ալեքսանյանի մահվան պատճառը. հայտնի են մանրամասներ
