Մեր ակնկալիքն այն է, որ մարդիկ հասկանան հայ ժողովրդի կրած կորուստներն ու տառապանքները. Պոլսո Հայոց պատրիարք Մաշալյան

Պոլսո Հայոց պատրիարք Սահակ եպիսկոպոս Մաշալյանը հարցազրույց է տվել թուրքական «Հուրրիյեթ» պարբերականին: Հարցազրույցի ժամանակ անդրադարձ է կատարվել Հայոց ցեղասպանության թեմային:

«Առաջին անգամ մենք մեր եկեղեցիներում հիշատակեցինք մեր հանգուցյալներին, աղոթք բարձրացրինք նրանց համար: Սա շատ դրական զարգացում էր: Մենք ստիպված չենք ամեն կատարվող դեպքին քաղաքական տեսանկյունից նայել: Ամեն ինչ ունի նաև մարդկային կողմ: Մարդուն կորցնելուց հետո չես կարող հետ բերել, բայց ցանկանում ես գոնե սուգ պահել: Մարդիկ պետք է հարգեն մյուս մարդկանց տառապանքները, քանի որ ցավը կիսելով է նվազում, իսկ ուրախությունը` կիսելով ավելանում»,-ասել է պատրիարքը:

Շատ մեծ դաս է Սիրիայում իրականացածը, երբ համերաշխ ապրող ժողովուրդը հանկարծ սկսեց իրար դեմ դուրս գալ: Այդպիսի մի բան էլ Առաջին համաշխարհայինի տարիներին աշխարհի բոլոր ժողովուրդներն ապրեցին: Դրվեց ազգայնականության հիմքը, բոլորը ցանկացան իրենց ազգային պետությունն ունենալ: Եթե ստեղծում եք ազգային պետություն մի վայրում, որտեղ բոլորը միասին են ապրել, մյուս ազգերի հետ ի՞նչ եք անելու»:

Մաշալյանը նշել է նաև, որ շատ կարևոր է բացահայտել ցեղասպանության իրական պատճառները, որի շնորհիվ հնարավոր կլինի ապահովագրել ապագան: