«Հիվանդ»-ի փոխարեն այսուհետ օգտագործվելու է «պացիենտ» հասկացությունը. փոխնախարար (տեսանյութ)

ՀՀ ազգային ժողովը քննարկում է կառավարության կողմից ներկայացված օրենքների նախագծերի փաթեթ, որով առողջապահության ոլորտում հստակեցվում են մի  շարք հասկացություններ, սահմանվում հստակ լիազորություններ: «Բնակչության բժշկական օգնության և սպասարկման մասին» ՀՀ օրենքում փոփոխություն կատարելու մասին և կից ներկայացված օրենքների նախագծերի փաթեթը ԱԺ նիստում ներկայացրեց ՀՀ առողջապահության փոխնախարար Անահիտ Ավանեսյանը:

«Օրենքը հանդիսանում է առողջապահության ոլորտի հիմնարար օրենքների մեկը: Առաջարկված փոփոխություններն ու լրացումները կոչված են պաշտպանելու պացիենտների իրավունքները մի կողմից և կառավարության և պետական լիազոր մարմնի իրավասությունները՝ մյուս կողմից: Նախագծով առաջարկվում է գործող օրենքի հասկացությունները լրացնել նոր սահմանումներով: Բժշկական օգնություն և սպասարկում իրականացնողների համար որպես պարտականություն սահմանվել է բժշկական հաստատություն տեղափոխված պացիենտի վերաբերյալ ՀՀ ոստիկանություն հաղորդում ներկայացնելը, եթե ԲԿ տեղափոխված պացիենտը գիտակցությունը կորցրած վիճակում է կամ ունի որոշակի վնասվածքներ, որոնք հիմք են տալիս ենթադրելու, որ տեղի է ունեցել բռնի կամ հակաօրինական գործողություն: Բարեփոխման արդյունքում ԲԿ-ները հստակ կունենան այն ծավալը, որի դեպքում պետք է հաղորդում ներկայացնեն ոստիկանություն»,-ասաց Ավանեսյանը:

Սահմանվել են էլեկտրոնային առողջապահության համակարգի ներդրմանը և գործունեության ապահովմանն ուղղված դրույթներ: Համակարգը ենթադրում է տեղեկատվության ենթակառուցվածքների ամբողջություն, ինչն ապահովելու է յուրաքանչյուր պացիենտի բժշկական տվյալների մուտքագրումը, մշակումը, պահպանումը, արխիվացումն ու օգտագործումը:

Սահմանվել է «բժշկական գաղտնիք» հասկացության իրավական բովանդակությունը, դրա փոխանցմանը և մշակմանը ներկայացվող պահանջները, մասնավորապես բժշկական գաղտնիքի փոխանցման պայմանները: Նախատեսվել է ստեղծել բուժաշխատողների ընդհանուր ռեգիստր, որի ստեղծման և վարման կարգը կսահմանի ՀՀ կառավարությունը:

Գործող օրենքի «Մարդու իրավունքները բժշկական օգնության և սպասարկման բնագավառում» գլուխը վերանվանվել է «Մարդու` պացիենտի իրավունքները և պարտականությունները` բժշկական օգնության և սպասարկման ոլորտում»: «Այսպիսով, մենք զերծ ենք մնում «հիվանդ» հասկացության օգտագործումից և օրենքում ներառել ենք «պացիենտ» հասկացությունը: Պացիենտների լրացուցիչ իրավունքների պահպանումը նպատակ ունի բարձրացնել նրանց իրավագիտակցությունը, իրավունքների պաշտպանության ոլորտում ապահովել համապատասխան օրենսդրական փոփոխություններ: Հաշվի է առնվել անչափահաս պացիենտների իրավունքների իրացումը և նրանց լրացուցիչ տեղեկացված լինելու և որոշակի վավերապայմանների առկայության դեպքում նաև սեփական որոշումներ կայացնելու իրավունք է սահմանվել»,-ասաց փոխնախարարը:

 ՀՀ մարզերում գործող բժշկական կազմակերպություններում բժշկական օգնություն և սպասարկում ստացող պացիենտներին առավել որակյալ, արագ և մատչելի սպասարկում կազմակերպելու նպատակով օրենքով ամրագրվել են հեռաբժշկություն ծառայության կազմակերպման վերաբերյալ դրույթներ: Ամրագրվել է լաբորատոր գործունեության վերաբերյալ դրույթ, ՀՀ կառավարությանը լիազորություն է վերապահվել կարգավորելու լաբորատոր ցանցի համակարգի հետ կապված հարաբերությունները` սահմանելու համընդհանուր լաբորատոր ցանցի համակարգը, բաղադրիչները, դրանցում ընդգրկված յուրաքանչյուր մակարդակի լաբորատորիաների գործառույթները: