Կոչ ենք անում խմբերով դասերին չհաճախելու կոչեր չլինեն. Արսեն Թորոսյան

Այսօր՝ փետրվարի 12-ին, Ազգային ժողովում կառավարության հետ հարցուպատասխանի ժամանակ ԲՀ խմբակցության պատգամավոր Վարդևան Գրիգորյանը խոսեց հանրապետությունում տիրող համաճարակային իրավիճակի մասին: Նա նշեց, որ ըստ իրենց հասած տվյալների հազարավոր աշակերտներ, ինչպես Երևան քաղաքում, այնպես էլ մարզերում H1N1 գրիպի պատճառով չեն հաճախում դպրոց:

Պատգամավորը ցանկացավ իմանալ, թե առողջապահության նախարարության կողմից ինչ միջոցառումներ են ձեռնարկվում այս վիճակը հաղթահարելու համար:

Հարցին պատասխանեց Առողջապահության նախարար Արսեն Թորոսյանը՝ նշելով, որ ստեղծված երևույթը պայմանավորված է եղանակային իրավիճակով, ինչպես նաև սեզոնով՝ երբ սուր շնչառական վարակներն ավելի են ակտիվանում. «Ինչպես ամեն ձմեռ, այս ձմեռ նույնպես ունենք մի փոքր լարվածություն և դրան ուղղված իրականացվում են բազմաթիվ միջոցառումներ»:

Թորոսյանն առողջապահության նախարարության կողմից իրականացվող մի քանի միջոցառումներ նշեց՝ ասելով, թե  լայն հանրային իրազեկում են անում, որպեսզի ավելորդ խուճապի առիթ չլինի․ «Կոչ ենք անում հատկապես ոչ մասնագիտական հանրույթից դասերը բոյկոտելու, խմբերով դասերին չհաճախելու կոչեր չլինեն, որովհետև դա ոչ միայն չի օգնում համաճարակի դեմ պայքարին, այլ հակառակը՝ ավելորդ խոսճապ է ստեղծում և խանգարում է դասապրոցեսին»։

Նա նշեց նաև, որ ամենօրյա ռեժիմով ԿԳՄՍ նախարարի հետ որոշում են կայացնում արդյոք կարիք կա դասերը դադարեցնելու, թե՝ ոչ․ «Այսօրվա դրությամբ նորից հայտարարում եմ, որ նման առիթ չկա: Բացակայությունների մեծ մասը պարզապես կանխարգելիչ բացակայություններ են: Երեխաները հիվանդ չեն, բայց դպրոց չեն գնում, որպեսզի չհիվանդանան: Մենք՝ ինքներս ենք, հիվանդ երեխաներին կոչ անում դպրոց չգնալ, և կատարում ենք ֆիլտրի գործողություն»:

Նախարարը հայտնեց, որ ամեն առավոտ հնարավոր բոլոր դպրոցների մուտքի մոտ բուժքույրերը կամ հիվանդությունների վերահսկողության և կանխարգելման կենտրոնի աշխատակիցները ստուգում են բոլոր հաճախող երեխաներին և ի սկզբանե սիպտոմներ ունեցող երեխաներին միանգամից ուղարկում են տուն։

Անդրադառնալով ԲՀԿ պատգամավոր Վարդան Գևորգյանի նշած H1N1 գրիպին Թորոսյանը նշեց, որ դա ունի հարյուրավոր շտամեր և դրանցից մեկն է H1N-ը: Նա նշեց, որ կան այլ շտամեր՝ H3N2-ը և դրանք ավելի վախեցնող չեն, քան մեկ այլ շտամը. «Դրանց դեմ պայքարի միջոցառումը նույնն է: Պետք չէ մրսել, պետք է ապահովել համապատասխան ջերմային պայմաններ բոլոր հաստատություններում, այդ թվում՝ դպրոցներում, մանկապարտեզներում և տանը: Չպետք է շփվել հիվանդ քաղաքացիների հետ, պետք է հաճախ լվացվել, որովհետև գրիպի վիրուսը նաև ձեռքերի միջոցով է փոխանցվում: Մենք որևէ թաքցնելու բան չունենք և ամեն օր օբյեկտիվ ներկայացնում ենք իրավիճակը»:

Առողջապահության նախարարի պատասխանից հետո ԲՀԿ պատգամավորն ավելացրեց, որ ոչ մի ծնող անհիմն չի ցանկանա իր երեխային դպրոց չուղարկել, եթե չլինի այդ վտանգը: Նա նշեց՝ եթե ավելացվեն իրազեկման հնարավորություններն ազգաբնակչությունն ավելի պատրաստ կլինի նման երևույթների դեմ պայքարելու համար:

Թորոսյանը պատասխանելով Գևորգյանի լրացմանը հավելեց, որ ամենօրյա ռեժիմով դա անում են․ «Այսօր 1032 երեխա ուղարկել ենք տուն։ Նախադպրոցական ուսումնական հաստատություններում և դպրոցներում սուր շնչառական վարակներով հիվանդացությունը կազմում է 5.8 տոկոս: Դպրոցների աշակերտների ընդհանուր բացակաների թիվը եղել է 5.8 տոկոս և գուցե եղել են դասարաններ որտեղ եղել է 50-60 տոկոս, բայց ի հակադրություն ձեր ասածի կարող եմ պնդել, որ դրանց մեծ մասը պարզապես դպրոց չեկած առողջ երեխաներ են, ովքեր վախենում են վարակվելուց»: