Սա ուղղակի Նիկոլ Փաշինյանի ցուցումով գործընթաց է. Նարեկ Սամսոնյան

«Ես տեղյակ չեմ, թե որ գործով են ինձ որպես մեղադրյալ ներգրավել: Հուսամ կարգավիճակս կլինի այնպիսին, որ ես անձամբ կկարողանամ ձեզ ասել, եթե ոչ` ապա փաստաբաններս կասեն: Նախկինում քաղաքական հետապնդման փորձեր էին անում, սա այլևս բացարձակ քաղաքական հետապնդում է և ես ներգրավված եմ որպես մեղադրյալ: Սա ուղղակի Նիկոլ Փաշինյանի ցուցումով գործընթաց է, որով 2 նպատակ է հետապնդվում. նվազագույնը՝ antifake.am-ի գործունեությունը խոչընդոտելն է, մամուլի հանդեպ ոտնձգությունն ու մեր աղբյուրների քանակը նվազեցնելն է: Մյուս նպատակը՝ ինձ մեկուսացնելն է մինչև հանրաքվեն, իմ ունեցած տեղեկություններով, այսպիսի սցենար են քննարկել, որ ես գալիս, խուսափում եմ նախաքննությունից, խոչընդում  եմ և իմ խափանման միջոցը ընտրվում է կալանավորումը»,- այս մասին այսօր՝ փետրվարի 15-ին, լրագրողների հետ զրույցում ասաց «Քաղաքացիական գիտակցություն» ՀԿ ղեկավար Նարեկ Սամսոնյանը: 

Նա վստահեցրեց, որ ոչ առաջինը, ոչ երկրորդը չի իրականանալու, որովհետև ինքը պատրաստվում է հանդես գալ հայտարարությամբ. «Մենք ունենում ենք ավելի շատ տեղեկություններ, քան հրապարակում ենք: Այն մարդիկ, ովքեր կունենան թեկուզ չնչին տեղեկություն, մենք պատրաստ ենք հրապարակել՝ անկախ նրանից, թե իմ կամ մյուսների նկատմամբ կկատարվի ոտնձգություն: Նիկոլ Փաշինյանին թույլ չենք տալու լռեցնել մամուլին»,- ասաց նա:

Սամսոնյանի խոսքով՝ նախորդ անգամ իր գրառման հետ կապված հարուցվել էր քրգործ, այդ ժամանակ քննիչն իրեն պահել էր հակաօրինական ձևով՝ խմբագրելով իր ցուցմունքը: Ըստ նրա՝ քննիչը սպառնացել էր նաև դատել Սամսոնյանին. «Նույն քննիչի մոտ է նաև այս գործը, որով ես մեղադրյալ եմ: Ըստ էության, քննիչը կատարում է իր խոստումը»,- ասաց նա:

Հարցին, թե ի՞նչ է սպասվում իրեն հիմա ի պատասխան Սամսոնյանն ասաց՝ կախված է նրանից, թե ինչպես քնից արթնացած կլինի Փաշինյանը և ինչ հրահանգ կտա ՀՔԾ պետ Սասուն Խաչատրյանին: