ՀՔԾ-ն ընդունում է՝ 3000 դոլարով սև խավյարի գնումը կա. Նարեկ Սամսոնյանը դուրս եկավ ՀՔԾ-ից

«Սուտ մատնություն է համարվել ոչ թե սև խավյարի գնման փաստը, այլ՝ Նիկոլ Փաշինյանի կոմից ՊԵԿ-ին հրահանգ տալու փաստը: Այսինքն ՀՔԾ-ն ընդունում  է, որ վարչապետի ընտանիքի կողմից 3000 դոլարով սև խավյարի գնումը կա, բայց չկա տեղեկատվության մյուս մասը»,- այս մասին ՀՔԾ-ից դուրս գալուց հետո լրագրողների հետ զրույցում ասաց «Քաղաքացիական գիտակցություն» ՀԿ նախագահ, AntiFake.am կայքի հիմնադիր Նարեկ Սամսոնյանը: 

Նրա խոսքով՝ ամենաաբսուրդայինն այն է, որ քննիչն աղավաղել է իր նախորդ անգամվա ցուցմունքը. «Ես գրել եմ՝ հրաժարվում եմ ցուցմունքից, քանի որ այն չի արտացոլում այն ինչ ես ասել եմ, ՀՔԾ-ն իմ ցուցմունքից հրաժարվելու հիման վրա հարուցել է այս քրեական գործը: Ինձ համար սա իրավական խուլիգանություն է, որի գլխին կանգնած է Նիկոլ Փաշինյանը: Այսինքն՝ յուրաքանչյուրի ֆեյսբուքյան գրառումը կարող է լինել քրեական գործ հարուցելու առարկա»,- ասաց նա: 

Սամսոնյանի խոսքով՝ Նիկոլ Փաշինյանի սանձազերծած արշավը ազատ խոսքի դեմ պետք է ամփոփվի ինչ-որ մեկի կալանավորմամբ. «Ես պատրաստ եմ լինել այդ մեկը»,- նշեց նա: 

Հիշեցնենք, որ հունվարի 26-ին «Քաղաքացիական գիտակցություն» ՀԿ նախագահ, AntiFake.am կայքի հիմնադիր Նարեկ Սամսոնյանը ֆեյսբուքյան գրառում էր արել՝ հանրությանը տեղեկացնելով, որ ՀՀ վարչապետի ընտանիքը 1 կիլոգրամը 3.000 դոլարով իկռա է գնում, ինչպես նաև մանրամասներ էր հայտնել իր աղբյուրին հղում անելով։