«Հյուսիս-հարավ»-ի ճանապարհահատվածում տեղադրվել է 52 ճանապարհային նշան
Հասարակություն
Հյուսիս-հարավ ճանապարհային միջանցքի Տրանշ-3-ի կապալառու կազմակերպության՝ չինական «Սինոհիդրո Քորփորեյշն» ընկերության ներկայացուցիչները Լանջիկ-Գյումրի ճանապարհահատվածի երկու ուղղություններով օրերս տեղադրել են 52 ճանապարհային նշաններ։
Այս մասին հայտնեց Ճանապարհային ոստիկանության պետ Եգոր Կարապետյանը «Բարգավաճ Հայաստան» խմբակցության կողմից հրավիրված «Ճանապարհային երթևեկության արդի հիմնախնդիրները և դրանց լուծման ուղիները» խորագրով խորհրդարանական լսումներին՝ պատասխանելով ներկաների հարցերին:
«Այն հատվածում, որտեղ պետք է ճանապարհային նշաններ տեղադրվեին, օրերս տեղադրվել են 52-ը: Բացի դա ՃՈ-ի ամենօրյա կարգախմբերը, որոնք ծառայություն են իրականացնում, պատասխանատուներին տեղեկացնում են ճանապարհային նշանների բացակայության և կոտրվելու դեպքերի մասին»,-ասաց Կարապետյանը:
Նա վստահեցրեց՝ Ճանապարհային ոստիկանությունը տարին երկու անգամ գարնանային և աշնանային հետազոտություններ է իրականացնում ոչ միայն «Հյուսիս-հարավ», այլև միջպետական և հանրապետական ճանապարհներին: Թերությունների մասին տեղեկատվությունն ամբողջությամբ ուղարկվում է պատկան մարմիններին՝ դրանք վերացնելու համար:
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
