ՁԻԱՀ-ի կանխարգելման կենտրոնի աշխատակիցները դիմումներ են ներկայացրել. ինչու են նրանք հեռանում

«ՁԻԱՀ-ի կանխարգելման հանրապետական կենտրոնի»-ի աշխատակիցների զգալի մասը աշխատանքից հեռանալու դիմում են ներկայացրել։ Այս մասին լրագրողների հետ հանդիպմանն ասաց կենտրոնի Համաճարակաբանության հսկողության բաժնի վարիչ Արշակ Պապոյանը։

«Հայտնում ենք մեր դժգոհությունը՝ ներկայացնելով աշխատանքից հեռանալու դիմում։ Այս պահին դիմում ներկայացրել է 75 մարդ։ Կենտրոնում աշխատակիցների թիվը 107 է։ Մենք մեկ տարի բարձրաձայնում ենք, որ չենք կարող այդպես աշխատել»,-ասաց նա։

Նրանք դժգոհում են, որ կառավարությունը որոշել է «ՁԻԱՀ-ի կանխարգելման հանրապետական կենտրոն»-ի միավորումը «ՆՈՐՔ» ինֆեկցիոն կլինիկական հիվանդանոցին։

Առողջապահության կազմակերպիչ Գևորգ Գրիգորյանը ասաց, որ աշխատակիցների դժգոհությունը, ավելի քան, ճիշտ է. «Նրանք, ընդամենը, ուզում են, որ իրենց լսեն, հաշվի առնեն նրանց բողոքները, մինչդեռ նախարարությունը պատրաստ չէ խոսել «ՁԻԱՀ»-ի կանխարգելման հանրապետական կենտրոնի աշխատակիցների հետ»։

Գրիգորյանը նաև նշեց, որ նախկինում առողջապահական ոլորտում նման խնդիրներ չեն եղել, քանի որ բուժհաստատությունները և նախարարությունը համագործակցել են։ «Շատ եմ ցանկանում, որ նախարարության ներկայացուցիչները հանդիպեն ու լսեն կենտրոնի աշխատակիցներին»,-ընդգծեց նա։

Պապոյանի խոսքով՝ այդ որոշումը լուրջ հետևանքներ կունենա. «Իսկ այս պահին ու շատ երկար տարիներ մենք ունենք կառավարելի վարակ, որը կենտրոնի աշխատակիցների աշխատանքի արդյունքն է»։

Նա նաև շեշտեց, որ որոշումը գաղտնի է իրականացվել. «Հիմա էլ մեզ ասում են, որ ծրագիրը կիրականացվի ու հետո նոր մեզ հետ քննարկում կիրականացնեն»։

Պապոյանն ասաց, որ չկա որևէ հիմնավոր պատճառ նման որոշում կայացնելու. «Երեկ նույնիսկ կառավարության դիմաց էինք։ Ամեն կերպ փորձում ենք երկխոսել նախարարի հետ, բայց նա հրաժարվում է»։

Նա նշեց, որ քննարկում եղել է, որին իրենք՝ կենտրոնի աշխատակիցները, հրավիրված չեն եղել. «Մեզ ասել են՝ լավ է լինելու, բայց դա քննարկում չէ»։ Պապոյանը վստահ է՝ իրենց չեն ուզում լսել, քանի որ որոշման համար մասնագիտական փաստարկներ չկան։ Նրանք նշեցին, որ երկու հաստատությունները իրար միացնելու նախագիծը կառավարության երեկվա նիստում չզեկուցվողներից է. «Իսկ ինչպես կարող է նման հարցը, որը մարդկանց առողջությանն է առնչվում, որոշվի գաղտնի»։