ՁԻԱՀ-ի կանխարգելման կենտրոնի աշխատակիցները անհնար են համարում «Նորք»-ի ինֆեկցիոն հիվանդանոցում աշխատելը

Մեր բողոքի պատճառն այն է, որ մեր երկրում, փաստորեն, կարևոր ռազմավարական նշանակություն ունեցող հարցերի վերաբերյալ որոշումները կայացվում են առանց մասնագետների հետ բովանդակալից քննարկման։ Այս մասին այսօր ԱԺ շենքի դիմաց լրագրողների հետ զրույցում ասաց ՁԻԱՀ-ի կանխարգելման կենտրոնի բողոքի ակցիա իրականացնող աշխատակիցներից մեկը։ 

«Այս պահի դրությամբ, փաստորեն, մենք մի կերպ կարողացել ենք հարթակ ստեղծել Ազգային ժողովի առողջապահության և սոցիալական հարցերի հանձնաժողովի մակարդակում, այնինչ դա պետք է տեղի ունենար շատ վաղուց, դեռ մեկ տարի առաջ և, առավել ևս, նախքան կառավարության որոշում ընդունելը, երբ որոշվեց, որ ՁԻԱՀ-ի կանխարգելման կենտրոնը պետք է միացնել «Նորք» ինֆեկցիոն հիվանդանոցին»,-ասաց աշխատակիցը։ 

Հարցին՝ ի՞նչն է  խանգարում նրանց նույնկերպ աշխատելու «Նորք»-ի ինֆեկցիոն հիվանդանոցում, աշխատակիցը պատասխանեց․ «Ողջ խնդիրը հենց դա է, որ նույնկերպ աշխատել անհնար է լինելու, որովհետև փոխվում է կառավարման մոդելը։ Ներկայիս գործող կառավարման մոդելի գնահատում նախ չի իրականացվել, որով ցույց տրվեր՝ եթե տվյալ համակարգը չի գործում կամ ինչ-որ թերություններ ունի, արդյոք այդ լուծումները «Նորք» ինֆեկցիոն հիվանդանոցի միացնելն է կամ բազմաթիվ մասնագիտական հարցեր՝ համաճարակի կառավարման հետ կապված, որոնք ոչ մի կերպ իրենց պատասխանը չեն գտնում  կառավարության որոշման մեջ»։ 

Դիտարկմանը, թե ինչպե՞ս է կառավարությունը հիմնավորում այդ որոշումը, աշխատակիցը պատասխանեց․ «Կառավարության հիմնավորումները, որոնք ներկայացվել են առողջապահության նախարարության կողմից,  ի չիք են դառնում,  երբ դրվում են լուրջ մասնագիտական քննարկման։ Մեր մասնագետների բոլոր վերլուծությունները ցույց են տալիս, որ դրանց մի մասը կամ բառակույտ են կամ  անհիմն են»։