Դատարանները ծանրաբեռնված են, բայց եկեք հասկանանք ո՞ւմ մեղքով. Սուրեն Գրիգորյան (տեսանյութ)

ՀՀ ազգային ժողովի «Իմ քայլը» խմբակցության պատգամավոր Սուրեն Գրիգորյանը դատական համակարգի բարեփոխումների փաթեթով դատավորների թեկնածուների հավակնորդների տարիքային շեմը իջեցնելու առաջարկը պայմանավորում է դատական համակարգում առկա իրողությամբ, և իջեցման հարցում լուրջ խնդիր չի տեսնում:

Անդրադառնալով դատավարների թեկնածուների հավակնորդների տարիքային շեմը 28-ից 25 դարձնելուն՝ նա նշեց, որ ոչ ոք չի ասում, թե կենսափորձը կարևոր չէ: «Բայց պետք է հասկանալ, թե մենք ինչ ժամանակաշրջանում ենք ապրում և ընկալել, որ մենք չունենք այն ստանդարտ իրավիճակը, որ կա շատ երկրներում: Այն երկիրներում, որտեղ սահմանվել է բարձր տարիքային շեմ, սահմանվել է որոշակի իրողությունից ելնելով: Մենք դա չունենք որպես իրողություն»,-ասաց Գրիգորյանն ու հորդորեց հարցնել շատ նիստերի մասնակցած ցանկացած փաստաբանի՝ բարձր տարիքի դատավորներից, թե ցածր տարիքի դատավորներից են ավելի գոհ:

Նրա համոզմամբ՝ չի կարող այդ հարցի պատասխանը լինել այն, որ ավելի շատ գոհ են բարձր տարիքի դատավորներից:

Պատգամավորը հիշեցրեց, որ դեռ 2019-ի օգոստոսին իր ֆեյսբուքյան էջում տեղադրել է ներկայացված փաթեթի e-draft-ում հրապարակումը: Հետևաբար, կարծում է, որ հապճեպության խնդիր չկա, նա հետաքրքրվեց, թե հապճեպությունից դժգոհող գործընկերները քանի մասնագիտական քննարկման են մասնակցել, նախաձեռնել, և նախարարությունը չի ընդառաջել: Անդրադառնալով ընդդիմադիր գործընկերների դիտարկումներին՝ նա շեշտեց՝ իշխանության որևէ ներկայացուցիչ չի ասել, թե բոլոր դատավորները վատն են:

«Դատարանները ծանրաբեռնված են, դա անվիճելի փաստ է, դրա մեջ իր չափաբաժինն ունի դատավորների քիչ քանակը, բայց նույն ձեր ասած հիմնականում կենսափորձով դատավորները դատական նիստերն անիմաստ հետաձգելով ստեղծել են ՀՀ-ում դատական գործը ձգձգելու ծառայություն: Եթե այդքան չհետաձգեն, այդքան ծանրաբեռնված չեն լինի»,-ասաց Գրիգորյանը՝ դիմելով ընդդիմադիրներին, որոնք դժգոհում էին տարիքային շեմը իջեցնելու գործադիրի առաջարկից: