Boeing-ի նոր ղեկավարը նախորդին մեղադրել է ընկերության արտադրանքի որակն իջեցնելու մեջ

ԱՄՆ-ի Boeing օդատիեզերական կորպորացիայի նախկին ղեկավար Դենիս Մելենբերգը կարողացել է հասնել ընկերության արտադրության ծավալների զգալի մեծացման, սակայն դա հանգեցրել է արտադրանքի որակի իջեցման:

Մարտի 5-ին The New York Times թերթում հրապարակված հարցազրույցում այդ կարծիքն է հայտնել Դեւիդ Քելհունը, որը 2019 թվականի դեկտեմբերին դարձել Է Boeing-ի նոր գլխավոր տնօրենը: 

Քելհունի խոսքով՝ գլխավորելով ընկերությունն՝ ինքը համոզվել է, որ այնտեղ ավելի շատ են խնդիրնեը, քան ավելի վաղ թվում Էր: «Անկեղծ ասած՝ դրանք ավելի շատ են, քան ես ենթադրում էի»,- նշել է նա: «Դա վկայում է մեր ղեկավարության թուլության մասին»,- հավելել է նա: 

Ինչպես կարծում է Քելհունը, Միացյալ Նահանգների կարգավորիչները կարող են Boeing 737 MAX ավիահանրանավերը հավաստագրել ընթացիկ տարվա ամռանը: 
2019 թվականին դադարեցվեց Boeing 737 MAX ինքնաթիռների շահագործումը երկու աղետից հետո: 2019 թվականի մարտի 10-ին Եթովպիայում կործանվեց Ethiopian Airlines ավիաընկերության Boeing 737 MAX 8-ը, զոհվեց 157 մարդ: 2018 թվականի հոկտեմբերի 29-ին Ինդոնեզիայում Lion Air ընկերության համանման մոդելի ինքնաթիռի աղետի զոհ դարձավ 189 մարդ: Boeing-ի ղեկավարությունը խոստովանեց, որ երկու դեպքում էլ օդանավերում դրանց կործանումից առաջ տեղի է ունեցել խափանում մանեւրայնության բնութագրերի բարելավման համակարգում: Դրանից հետո բազմաթիվ երկրներ, ներառյալ ՌԴ-ն, ԱՄՆ-ն եւ Եվրամիության պետությունները, անվտանգության նկատառումներով դադարեցրել են այդ սերիայի ինքնաթիռների շահագործումը, հաղորդել է ՏԱՍՍ-ը: