Վերաքննիչ քաղաքացիական դատարանը որոշ դատական նիստերի քննությունը կիրականացնի գրավոր ընթացակարգով

Կորոնավիրուսի վարակի տարածման հավանականությունը նվազեցնելու նպատակով  Վերաքննիչ քաղաքացիական դատարանը մարտի 16-ից 23-ը ընկած ժամանակահատվածում նշանակված դատական նիստերի քննությունը կիրականացնի գրավոր ընթացակարգով։ Այս մասին հայտնեցին Վերաքննիչ քաղաքացիական դատարանի աշխատակազմից։

«Այն դատական գործերով նշանակված դատական նիստերը, որոնցով պետք է ապահովել բանավոր կարգով քննություն, Վերաքննիչ դատարանի որոշումներով կհետաձգվեն, որի մասին գործին մասնակցող անձինք պատշաճ կծանուցվեն։ Խնդրում ենք դատական գործերի ընթացքին հետևել  առցանց՝ datalex.am դատական տեղեկատվական համակարգի և ՀՀ վերաքննիչ քաղաքացիական դատարանի ֆեյսբուքյան էջի միջոցով։

Հրատապ և հույժ անհրաժեշտ դեպքերում փաստաթղթերը կարող եք ուղարկել միաժամանակ փոստով և դատարանի էլեկտրոնային փոստի հասցեին՝ [email protected]:

Գործին մասնակցող անձանց խնդրում ենք գործի նյութերին ծանոթանալու, դրանց պատճենները ստանալու, գործի նյութերից քաղվածքներ, լուսանկարներ, լուսապատճեններ և պատճեններ անելու համար դատարանի գրասենյակ ներկայանալ միայն խիստ անհրաժեշտության դեպքում»,- նշված է հաղորդագրության մեջ։