Արցախում արտադրվող ալկոգելը կապահովի ոչ միայն բնակչության, այլեւ բանակի կարիքները. Արայիկ Հարությունյան (տեսանյութ)

Պարենային անվտանգության մասին անհոգ եղեք, սննդի խնդիր Արցախում չկա: Այս մասին ֆեյսբուքի եթերում հայտարարել է Արցախի Հանրապետության նախագահի թեկնածու Արայիկ Հարությունյանը:

«Քաղաքացիների շրջանում կա ալկոգելի մասով մտահոգություն, դեղատներում դեֆիցիտ կա: Սակայն, ուզում եմ ասել, որ Արցախում արտադրվում է ալկոգել: Ասկերանի և Ստեփանակերտի գինու գործարաններում կա համապատասխան հումքը և ինչքան պետք է՝ կարտադրվի: Համոզված եղեք՝ ինքան պետք է՝ կարտադրվի: Այն բավարարելու է ոչ միայն մեր բնակչությանը, այլեւ կապահովենք Բանակի համար անհրաժեշտ պաշարները: Արտադրվումեն նաեւ դիմակներ»:

Արայիկ Հարությունյանն անդրադարձել է նաեւ Մարտունու միջադեպին:

«Դրսի, թե այլ ուժեր ծրագրավորված քաղաքականություն են իրականացնում իմ անձի դեմ, ամիսներ շարունակ խոսում են, որ չեն թողնելու, որ ես առաջադրվեմ, ասում, թե մինչև ամսի 21-ը հրաժարվելու եմ հետագա պայքարից: Նույն ուժերը վիրավորելով իմ անձը, ակնկալելով որ իմ համախոհները գնալու են ընդհարումների, ստեղծում են նման իրավիճակ: Չի ստացվելու, որովհետև մենք կողմնակից ենք համերաշխության: Բոլորին համերաշխության կոչ եմ անում: Բայց այն ուժերը, որ փորձում են պառակտել՝ դավադիր ուժեր են, և չենք թողնելու: Վերջում ասեմ, որ ժողովուրդը հաղթելու է, ժողովրդի քվեն ոչ ոք  չի կարողանալու գողանալ», ասել է Ա.Հարությունյանը:

Հիշեցնեմ, որ այսօր Artsakh1.am ֆեյսբուքյան էջը տեսանյութ էր հրապարակել, որտեղ երեւում է, թե ինչպես է Արցախի Մարտունու քաղաքապետը ճանապարհը փակում եւ խոչընդոտում Արցախի հեղափոխական կուսակցության ներկայացուցիչների մուտքը Մարտունի` պատճառաբանելով, որ նախագահի թեկնածու Արայիկ Հարութունյանն իր ընկերն է ու թույլ չի տալու նրա դեմ խոսել։ Միջադեպին անդրադարձել է Արցախի օմբուդսմեն Արտակ Բեգլարյանը: