Ծաղրել անձին, հատկապես պետության ղեկավարին, ուղղակի անբարոյականություն է․ Արթուր Ղազինյան

«Մեկ Հայաստան» կուսակցության ղեկավար Արթուր Ղազինյանը ֆեյսբուքյան իր էջում գրել է. 

«Չեմ կարողանում հասկանալ այդ տեսանյութը տարածելու և դրա շուրջ մեծ աղմուկ բարձրացնելու իմաստը։

Վերջին 10 տարիներին մասնակցել եմ ավելի քան 100 ուղիղ եթերների, և կարող եմ փաստել, որ ցանկացած ուղիղ եթերից առաջ մշտապես լինում են եթերից դուրս մնացած հետաքրքիր կադրեր։

Տեսանյութը պատրաստողների նպատակը պարզ է և հասկանալի, բայց ոչ մի կերպ չի հասկացվում այն հանրայինացնող և ակտիվորեն տարածող ու քննարկող իշխանության ակտիվիստների վարքագիծը։ Իրենց առաջնորդին պաշտպանելու մղումով նրանք առավել մեծ հանրայինություն հաղորդեցին և ավելացրեցին տեսանյութի նկատմամբ հանրային հետաքրքրությունը։