Նորօրյա ոտնձգություններ հայ դպրոցի և հայոց լեզվի դեմ. Արմեն Այվազյան

«Արարատ» ռազմավարագիտական կենտրոնի տնօրեն, պատմաբան և քաղաքագիտության դոկտոր Արմեն Այվազյանն իր ֆեյսբուքյան էջում «Նորօրյա ոտնձգություններ հայ դպրոցի և հայոց լեզվի դեմ» վերնագրով գրառում է կատարել.

«Մեսրոպ Մաշտոցի հանճարեղ գյուտից ու բախտորոշ գործունեությունից ի վեր Հայկական դպրոցը փակելու երեք փորձ է եղել՝ երեքն էլ ցարական իշխանության օրոք՝ 1885, 1896 և 1903 թթ.։ Բոլորն էլ տապալվել են՝ հայ ժողովրդի ցույց տված կատաղի դիմադրության շնորհիվ։

Այն, ինչ անում է այսօր մեր դպրոցի հետ փաշինյանական իշխանությունն ու նրա ԿԳՄՍ նախարարությունը, արդեն սկսում է նմանվել եթե ոչ հայկական դպրոցները փակելուն, ապա դրանք տկարացնելու և հեղինակազրկելու հերթական մի օտարածին փորձին։ Իսկ ուրիշ ինչպե՞ս կարելի է մեկնաբանել թագավարակի դեմ պայքարի կեղծ պատրվակով կառավարության ընդունած որոշումները՝ բնականոն դասընթացները վերսկսելու փոխարեն ուսումնական տարին հեռավար ուսուցման թերի և անկատար եղանակներով եզրափակելու, թվանշանների ու քննությունների համակարգը չեղարկելու, դպրոցը մինչև ուսումնական տարվա վերջ չվերաբացելու մասին։ Այնինչ ճիշտը դպրոցները ոչ միայն վերաբացելն է (ինչպես անում են, օրինակ, Ավստրիայում և այլ պետություններում), այլև դեռ մեկ ամսով էլ ուսումնառությունը երկարացնելն է՝ բաց թողնվածը լրացնելու նպատակով։

Իբր այսքանը քիչ է, կառավարությունը որոշել է ԲՈՒՀ-երի ընդունելության քննություններից հանել «Հայոց լեզու» առարկան, ահավասիկ. «Յուրաքանչյուր ֆակուլտետ ընդունվելու համար դիմորդները կհանձնեն մեկ քննություն, թե որը պետք է լինի մասնագիտությամբ պայմանավորված հիմնական ու միակ քննությունը, դեռ որոշման փուլում է», -- այս մասին մամուլի ասուլիսի ժամանակ ասել է այսօր ՀՀ ԿԳՄՍ նախարարի տեղակալ Ժաննա Անդրեասյանը՝ ի պատասխան ԼՈՒՐԵՐ.com-ի հարցին։

Հիշեցնեմ, որ ԲՈՒՀ-երի ոչ հումանիտար ֆակուլտետներում հայագիտական առարկաների դասավանդման կրճատումը կառավարությունը մտմտում էր տակավին անցյալ տարվա աշնանը և թագավարակի «համաճարակը», փաստորեն, հարմար առիթ դարձավ բոլորովին ուրիշ կողմից հայոց լեզվին հարված հասցնելու համար։

Ի դեպ, հայոց լեզվի հանդեպ իմքայլականների ունեցած արհամարհական վերաբերմունքը երևակվեց դեռևս 2018 թ., երբ իշխանությունն ստանձնելուց անմիջապես հետո նրանք շտապեցին ստորագրել դեռևս նախորդ իշխանության պատրաստած որոշումը՝ Լեզվի տեսչության լուծարման մասին։

Համոզված եմ, որ հայ դպրոցի ու հայոց լեզվի դեմ այս ոտնձգությունները կարժանան նույնպիսի անփառունակ վախճանին, ինչպիսին արժանացան ցարական վերը հիշատակված որոշումները։ Հայ ժողովուրդն ու ժամանակն ամեն ինչն իր տեղը կդնեն։

Հ.Գ. Անցյալ տարվա նոյեմբերին արդեն անդրադարձել եմ ԲՈՒՀ-երի ոչ հումանիտար ֆակուլտետներում հայագիտական առարկաների կրճատման կառավարության նախաձեռնություններին ու Նիկոլ Փաշինյանի այդ առթիվ տրված հիմնավորումներին՝ «Ի՞նչն եք ինչի հետ համեմատում, պարո՛ն Փաշինյան» համառոտ վերլուծականով (https://news.am/arm/news/543455.html)»։