Էդ հողերը մեր տղերքի արյունով են «ճփճփում». բոլոր դիրքերը հետ ենք բերելու. Գեներալ Բեկ (տեսանյութ)

Գեներալ Բեկը՝ Աղաբեկ Խաչատրյանը, Երևանում սարքել է պատերազմի ժամանակ չեզոք գոտում թողած 112 պոստը, որի յուրաքանչյուր քարի վրա գրել է պատերազմի դաշտում հերոսացած ընկերների անունները։ ԼՈՒՐԵՐ․com-ի հետ զրույցում՝ խոսելով հայ-ադրբեջանական սահմանային լարվածության մասին, Գեներալ Բեկն ասում է՝ մեր բանակն ու մեր զինվորը արժանի հակահարված տվեցին հակառակորդին․ «Շատ կարևոր նշանակություն ունեցող դիրքեր գրավեցինք, իսկ մյուս դիրքերը՝ դեռ հետ ենք բերելու։ Շատերն ասում են՝ ինչի՞ համար են մեր զոհերը․ եթե էդ տղերքը չլինեին, բանակը չհելներ դեմները կանգներ՝ թուրքերը գյուղերը կփրթեին։ Էդ տղերքը զոհվան հանուն հայրենիքի՝ հերոսաբար։ 10 000 տղու կյանք ենք կորցրել, էդ հողը ճփճփում ա արյունով, ի՞նչ հողեր տալու մասին ա խոսքը»,- նշեց նա։

Գեներալ Բեկն ու կռված ընկերները մշտապես այս դիրքում են լինում, որտեղ յուրաքանչյուր իր՝ լուսանկար, քարտեզ, զինվորական գլխարկ, գրված թիվ՝ մի նշանակություն ունի։ Մեզ հյուրընկալելու պահին էլ դիրքում մենակ չէր․ այնտեղ էր նաև փոխգնդապետ Մարտին Բաղդասարյանը։

112 պոստը յուրօրինակ հուշահամալիր է՝ ապագա զինվորներին արիությամբ դաստիարակելու, պայքարելու ոգի և հայրենիքի հանդեպ նվիրվածություն սերմանելու համար։ Հուշահամալիրի մուտքն ազատ է․ ծնողներն իրենց երեխաներին այստեղ են բերում պատմական իրողությունները կերտելու ու հերոսներին ճանաչելու համար։

Սոնա Հարությունյան