Երկրագնդի վրա նոր օվկիանոս է առաջանալու. NBC News (տեսանյութ)

Տեկտոնական տեղաշարժերի  արդյունքում, որը տեղի կունենա 5-10 միլիոն տարվա ընթացքում, Աֆրիկայի արևելյան մասում նոր օվկիանոս կարող է հայտնվել: Այս մասին հաղորդել են Միացյալ Նահանգների և Բրիտանիայի գիտնականները, Lenta.ru-ի փոխանցմամբ՝ հայտնում է NBC News-ը:

Դեռևս 2005 թ․-ից Աֆրիկյան մայրցամաքի եթովպական  հատվածում՝ տեկտոնական սալերի միացման մասում, առաջացավ ճեղքվածք, որի երկարությունը հիմա հասնում է 56 կիլոմետրի: Սա ամբողջ աշխարհում եզակի վայր է:

Բրիտանական Լիդսի համալսարանի գիտնական Քրիստոֆեր Մուրի խոսքով ՝ այս վայրում մայրցամաքային անցքը վերածվում է օվկիանոսի:

Ինչպես նշել է Սանտա Բարբարայի Կալիֆոռնիայի համալսարանի գեոֆիզիկոս Քեն Մաքդոնալդը,  միլիոնավոր տարիներ անց Ադենի ծոցը և Կարմիր ծովը հեղեղելու են Արևելյան Աֆրիկայի ռիֆտային հովիտը, ինչի արդյունքում կստացվի նոր օվկիանոս: Աֆրիկայի արևելյան մասը, իր հերթին, վերածվելու է առանձին փոքր մայրցամաքի, նշել է գիտնականը:

Տեսանյութում դեռևս 2018 թ․ հրապարակված կադրերն են՝  Քենիայից։