Եթե մեր եղբայրները մնան Բաքվում, ով ուզում է լինի դրա մեղավորը, կյանքը կխլեմ. անհետ կորած զինվորի հայր

Անհետ կորած զինվորների հարազատները ՀՀ վարչապետի պաշտոնակատար Նիկոլ Փաշինյանի հետ այսօր տեղի ունեցած հանդիպման ժամանակ պահանջել են ստեղծել հանձնաժողով։ Այս մասին հանդիպումից հետո տեղեկացրել է անհետ կորած զինվորի հայրը՝ նշելով, որ Նիկոլ Փաշինյանը տվել է իր համաձայնությունը։

Հանձնաժողովը զբաղվելու է գերիների, անհետ կորած զինվորների հարցերով. «Դեկտեմբերի 17-ին իմ տղան գերի է եղել, դեկտեմբերի 20-ին նրան տեսել են վիրակապված, իսկ հիմա ինձ ասում են՝ ԴՆԹ-ն համապատասխանում է, երեխուդ պիտի հուղարկավորես: Ո՞վ է այս հարցով զբաղվում, թող պատժվի, ես չեմ հրաժարվում, գլխից խփող եմ»,- ասել է զինվորի հայրն՝ հավելելով. «Եթե մեր եղբայրները մնան Բաքվում, ով ուզում է լինի դրա մեղավորը, առանց վարանելու կվերացնեմ էս երկրից, կյանքը կխլեմ, չի կարող նման բան լինել, ես պայքարելու եմ, որ մեր երեխեքը հետ գան»:

Վերջինս վստահեցրեց, որ գերիների թիվն ավելի շատ է, քան անհետ կորածներինը. «Մարդիկ տեսանյութերով հստակ տեսնում են, իրենց հորը ձերբակալել են, բայց իրեն ասում են՝ զոհվել է, չկա: Իմ որդուն դեկտեմբերի 17-ին վիրահատել են, մեկ էլ դեկտեմբերի 20-ին հայտնվեց 60 օրվա «լխճված մարմին», ինչպե՞ս: Կրկնակի ԴՆԹ ենք տվել, դեռ չկա պատասխանը, ես իրենց պատասխանին էլ չեմ հավատում, դիտմամբ ամիսներով ձգձգեցին, ոսկորները հնեցրին, որ ԴՆԹ կոդ չանջատվի »,-ասել է զինվորի հայրը: