Փոխհրաձգություն՝ ադրբեջանա-իրանական սահմանին. կա վիրավոր

Ադրբեջանի գլխավոր դատախազությունն ու պետական սահմանապահ ծառայությունը համատեղ հայտարարություն են տարածել, որ երկրի ուժայինները կանխել են Իրանի Իսլամական հանրապետությունից դեպի Ադրբեջանի տարածք առանձնակի խոշոր չափի թմրանյութ տեղափոխելու փորձը:

Ինչպես հայտնում է ԱՊԱ-ն, սահմանը խախտելու մտադրություն ունեցող անձինք չեն ենթարկվել սահմանապահների հրահանգներին և կրակ են արձակել վերջիններիս ուղղությամբ:

Ավելի ուշ, կողմերի միջև ծագած փոխհրաձգության հետևանքով իրավախախտներից մեկը՝ Իրանի քաղաքացի 50-ամյա Նադիրզադե Աղաջան Նասիրօղլուն հրազենային վիրավորում է ստացել, ապա՝ ձերբակալվել, իսկ նրա գործընկերը դիմել է փախուստի:

Ադրբեջանցի իրավապահները հայտնաբերել և առգրավվել են 7 կգ 935 գրամ կշռող հոգեմետ միջոց (մարիխուանա), ինչպես նաև զենք ու զինամթերք: Փաստի առթիվ հարուցվել է քրեական գործ: