Իրանում 16-ամյա դստեր սպանությունից հետո մայրը ստիպված է եղել փախչել երկրից

Իրավունք 2 Նոյեմբեր, 2026 15:05

Իրանում հակակառավարական ցույցերի ժամանակ 16-ամյա դստերը կորցրած Սամիրան այժմ թաքնվում է արտերկրում և փորձում է բացահայտել աղջկա սպանության համար պատասխանատուներին։

Սամիրայի խոսքով՝ հունվարի 9-ին անվտանգության ուժերը կրակել են իր դստեր՝ Սևդայի վրա, երբ վերջինս մասնակցում էր Թեհրանի մերձակայքում անցկացվող բողոքի ցույցերին։ Գնդակը դիպել է աղջկա սրտին։

Մայրը պատմել է, որ դստեր մարմինը գտնելու համար օրեր շարունակ փնտրել է նրան Թեհրանի դիահերձարաններում։ Ի վերջո, Սևդային գտել է այլ զոհերի մարմինների տակ։

Սամիրայի պնդմամբ՝ մարմինը հուղարկավորելու համար իշխանությունները ստիպել են իրեն հայտարարել, թե աղջկան սպանել են «ահաբեկիչները», ոչ թե անվտանգության ուժերը։ Ավելի ուշ նրան առաջարկել են դստերը «նահատակ» ճանաչել և ընտանիքին բնակարան ու այլ արտոնություններ տրամադրել՝ դրա դիմաց պահանջելով հարցազրույցում պնդել, թե Սևդան սպանվել է ցուցարարների կողմից։

Մայրը հրաժարվել է և դստեր մահվան 40-րդ օրվա արարողությունից հետո մարդկանց մաքսանենգությամբ զբաղվողների օգնությամբ փախել Իրանից՝ անցնելով գետեր ու լեռներ։

Նա այժմ արտերկրից հրապարակում է անվտանգության ուժերի ներկայացուցիչների և պաշտոնյաների անունները, որոնց պատասխանատու է համարում ցուցարարների սպանությունների համար։ Սամիրայի խոսքով՝ իր նկատմամբ հեռակա կարգով մեղադրանքներ են առաջադրվել, այդ թվում՝ «մոհարեբե»՝ Աստծո դեմ պատերազմ մղելու մեղադրանքը, որը կարող է մահապատժի հիմք դառնալ։

Մայրը նաև հայտնել է, որ Իրանում ձերբակալվել են իր հարազատներից ու ընկերներից մի քանիսը, իսկ ընտանիքին սպառնացել են տեղափոխել դստեր մարմինը գերեզմանից, եթե շարունակեն հավաքվել նրա շիրիմի մոտ։

Իրանի իշխանությունները ընդունում են, որ բողոքի ցույցերի ընթացքում զոհվել է ավելի քան 3000 մարդ։ Մինչդեռ Hrana իրավապաշտպան կազմակերպության գնահատմամբ՝ զոհերի թիվը գերազանցում է 7000-ը, որոնց մեծ մասը ցուցարարներ են։

Լոնդոնում Իրանի դեսպանատունը BBC-ին հայտնել է, որ բողոքի ցույցերը, իր գնահատմամբ, հրահրվել են օտարերկրյա ուժերի կողմից։

Սամիրան ասում է, որ չի պատրաստվում լռել և շարունակելու է պայքարել դստեր ու մյուս զոհերի համար արդարադատության հասնելու նպատակով։