Սա ոչ թե ռուս ժողովրդի, այլ Պուտինի պատերազմն է. Շոլց

Գերմանիայի կանցլեր Օլաֆ Շոլցը չի պաշտպանում ռուսներին շենգենյան վիզաների տրամադրման հնարավոր արգելքը՝ նշելով, որ Ուկրաինայում տեղի ունեցող իրադարձությունները «ռուս ժողովրդի պատերազմը» չեն։ Այս մասին նա հայտարարել է երկուշաբթի օրը Օսլոյում Սկանդինավյան խորհրդի նիստի շրջանակներում համատեղ մամուլի ասուլիսում։ «Ես կարծում եմ, որ սա ռուս ժողովրդի պատերազմը չէ, սա [Ռուսաստանի նախագահ Վլադիմիր] Պուտինի պատերազմն է, և մենք պետք է շատ հստակ լինենք այս հարցում»,- ասել է Շոլցը։ Այսպիսով, Գերմանիայի կառավարության ղեկավարն անուղղակիորեն հաստատել է, որ Բեռլինը դեմ է բոլոր ռուսաստանցիների համար վիզային սահմանափակումներին։

Միևնույն ժամանակ, կանցլերը նշել է, որ Գերմանիան դեռ աջակցում է Ռուսաստանի քաղաքացիների դեմ պատժամիջոցներին, որոնք, ըստ գերմանական իշխանությունների, պատասխանատու են ուկրաինական իրադարձությունների համար և շահում են դրանցից։ Պատժամիջոցների կիրառումը Ռուսաստանից այն անձանց դեմ, ովքեր պատասխանատու են Ուկրաինայի հակամարտության համար, և «շատ օլիգարխների, ովքեր ֆինանսական և տնտեսական օգուտներ են ստացել» Ռուսաստանի Դաշնության ղեկավարությունից, ըստ Շոլցի, «կարևոր որոշում էր»։ «Եվ մենք կշարունակենք դա անել»,- ամփոփել է կանցլերը։