Apple-ի աշխատակիցը կարող է հեռացվել TikTok-ի պատճառով, որտեղ բացահայտել է ընկերության «գաղտնիքները»

Apple-ը մտադիր է աշխատանքից հեռացնել աշխատակցին, ով TikTok-ի տեսանյութ է հրապարակել՝ բացահայտելով iPhone-ի անվտանգության հիմնական տեղեկությունները։ Այս մասին հայտնում է The Verge-ը։

Փերիս Քեմփբելը խախտել է ընկերության քաղաքականությունը՝ խոստովանելով, որ աշխատել է Apple-ում և հրապարակել ապրանքանիշի գործունեության հետ կապված կոնտենտ: Ընկերության՝ սոցիալական ցանցերում հրապարակումների մասին բաժնում ասվում է, որ աշխատակիցները չպետք է առցանց տեղեկատվություն հրապարակեն հաճախորդների, գործընկերների կամ գաղտնի տվյալների մասին:

«Ես չեմ կարող խոսել այն մասին, թե ինչպես գիտեմ դա, բայց վերջին վեց տարիների ընթացքում ես աշխատում եմ՝ որպես հավաստագրված ինժեներ մի ընկերությունում, որը սիրում է խոսել մրգերի մասին: Ձեր հեռախոսն անիմաստ իր է նրանց [հակերների] ձեռքում, և միակ մարդը, ով կարող է օգնել նրանց, դուք եք, և հավանաբար դուք դա չեք անի»,- ասել է Քեմփբելը TikTok-ում:

Տեսանյութը տարածվել է՝ մեկ օրում հավաքելով ավելի քան 5 միլիոն դիտում։ Քեմփբելը այնուհետև զանգ է ստացել իր մենեջերից, ով պահանջել է հեռացնել տեսանյութը, այլապես նրան կստիպեն քայլեր ձեռնարկել՝ «ընդհուպ մինչև աշխատանքից ազատելը»: 

Այնուհետ Քեմփբելը հրապարակել է երկրորդ տեսանյութը, որում նա արդեն ուղղակիորեն ասել է, որ Apple-ի աշխատակից է, և սպասում է տեղեկությունների՝ իրեն կազատե՞ն աշխատանքից, թե՞ ոչ։ Կնոջ խոսքով՝ իր տեսանյութերում գաղտնի տեղեկատվություն չկա՝ իր ասածն արդեն հայտնի փաստ է։

Apple-ը դեռևս պաշտոնական մեկնաբանություն չի տվել այս հարցի վերաբերյալ։