Այս պահի դրությամբ Բերձորը լքած ընտանիքների մեծ մասը տեղափոխվել է Հայաստան․ քաղաքապետ

«Այս պահի դրությամբ, Բերձորից հեռացել է 10-12 ընտանիք, ևս 45 ընտանիք դեռ քաղաքում է»,-ԼՈՒՐԵՐ․com-ի հետ զրույցում ասաց Բերձորի քաղաքապետ Նարեկ Ալեքսանյանը։

Նրա խոսքով, քաղաքում մնացածների մեջ շատ են միայնակ բնակիչները, այսինքն՝ 45 ընտանիք ասելով, դրանց մեջ պետք է նկատի առնել նաև միայնակներին։

Հարցին, թե գաղթող բերձորցիներից քանիսն են նախընտրել մնալ Արցախում, և քանիսը՝ Հայաստան մեկնելու ցանկություն են հայտնել, Ալեքսանյանն ասաց․

«Հեռացածների մեծ մասը՝ այսինքն շուրջ 80 տոկոսը տեղափոխվել է Հայաստան։ Այս պահին շարունակվում են մարդկանց տարհանման և կազմակերպչական բնույթի աշխատանքները․ դժվար է, ինչ խոսք»։

Բերձորի քաղաքապետից հետաքրքրվեցինք նաև, թե արդյո՞ք Աղավնոյի պես իրենց համար էլ օգոստոսի 20-նն է ընտրված կամ հայտարարված որպես տարհանման ողջամիտ վերջնաժամկետ։

«Նման բան հստակ չենք կարող ասել․ պայմանական կարող է լինել օգոստոսի 20-ը կամ 21-ը։ Ամեն պահի կարող է լույս ու կապ չլինել։ Օրինակ երեկ լույս չենք ունեցել։ Հիմա ամեն ինչ խառն է․․․» ,- նշեց մեր զրուցակիցը։

Զրուցեց՝ Արա Ալոյանը