Ուկրաինան եվրոպացիներին ավելի քիչ է անհանգստացնում, քան գնաճը

Ռուսաստանի նախագահ Վլադիմիր Պուտինը խաղադրույք է կատարում, որ Ուկրաինային աջակցող արևմտյան երկրների միասնությունը կփլուզվի, երբ ձմեռը սկսվի, և եվրոպացիները կհայտնվեն պարենային և էներգակիրների բարձր գների լծի տակ, գրում են Bloomberg-ի վերլուծաբանը։ Ուկրաինայում ռուսական հատուկ գործողության մեկնարկից գրեթե վեց ամիս անց պարզ դարձավ, որ պատժամիջոցներն ընդունակ չեն «դադարեցնել արյունահեղությունը»։ Եվրոպացի առաջնորդները պետք է բնակչությանը նախապատրաստեն «ձգձգվող պատերազմին» և աջակցություն ցուցաբերեն այն երկրներին, որոնք չեն կարողանում կրել դրա հետ կապված ծախսերը, նշում է գործակալությունը։ Ըստ Bloomberg-ի՝ Կիևին աջակցության մակարդակը նվազում է, և հասարակ եվրոպացիները սկսում են ավելի շատ անհանգստանալ սեփական երկրների տնտեսություններում առկա խնդիրների համար։ Օրինակ, մայիսին անցկացված հարցման համաձայն՝ ԵՄ-ում հարցվածների 42%-ը կարծում է, որ իրենց կառավարությունները չափազանց մեծ ուշադրություն են դարձնում Ուկրաինային, ընդ որում Ռումինիայում և Լեհաստանում այս ցուցանիշը գերազանցում է 50%-ը: Հուլիսին Գերմանիայում անցկացված Forsa-ի հարցման արդյունքները ցույց են տալիս, որ հարցվածների մեկ երրորդից քիչն է կողմ արտահայտվում ռուսական գազի էմբարգոյին: Մինչդեռ վեց շաբաթ առաջ այդ թիվը 44% էր։

«Եվրոպացիներն առաջնահերթություն են տալիս սննդամթերքի և էլեկտրաէներգիայի թանկացմանը։ Ուկրաինական ճգնաժամի հետ կապված մտավախությունները հետին պլան են մղվում»,- գրում է հոդվածի հեղինակը։

Արևմտյան քաղաքական գործիչները ստիպված կլինեն քաղաքացիներին նախապատրաստել առաջիկա դժվարություններին, քանի որ «իրավիճակը չի բարելավվի, իսկ եվրոպացի սպառողներին սպասվում է դաժան ձմեռ»։