Ովքեր են «սրբորեն» շարունակում նախկին իշխանությունների ավանդույթները

Վերջին շրջանում և ոչ միայն, տեղեկատվական դաշտում ավելի ու ավելի հաճախ կարելի է հանդիպել  լուրեր առ այն, որ ՔՊ-ական այս կամ այն պաշտոնյան ստիպում է իր ենթակայության տակ աշխատողներին անդամագրվել ՔՊ-ին, իսկ հրաժարվողներին սպառնում է աշխատանքից ազատում:

Օրինակ` 2019-ին երբ Արարատի մարզպետ էր դեռևս Գարիկ Սարգսյանը,  մարզի Նորաշեն համայնքի բնակիչները բողոքի ակցիա էին կազմակերպել  մարզպետարանի շենքում։ Նրանք դեմ էին Սարգսյանի որոշմանը և պահանջում էին Նորաշենի համայնքապետ Նորայր Գրիգորյանին վերականգնել իր պաշտոնին։ Ինքը` Գրիգորյանը, հայտարարել էր, որ իր դեմ Սարգսյանը լարված է այն պատճառով, որ մերժել է ՔՊ-ին անդամագրվելը:

Լրատվամիջոցները այսօր գրել էին, որ Երեւանի ավագանու առաջիկա ընտրություններից առաջ իշխող ուժը պետական կառույցները ՔՊ-ականացնելու խնդիր է դրել։ Քանաքեռ-Զեյթուն վարչական շրջանում այս գործընթացն իրականացվում է առանց ձեւականությունների։ Աշխատակիցներից ահազանգ ենք ստացել, որ փոխթաղապետ Վարդան Բեկչյանը նրանց կանչում է իր մոտ եւ պայման դնում՝ կա՛մ մտնում ես ՔՊ, կա՛մ կորցնում ես աշխատանքդ:

Մամուլը գրել էր նաև, որ «Սուրբ Գրիգոր Լուսավորիչ» բժշկական կենտրոնի աշխատակիցներին ստիպում են գնալ այսօր Հանրապետության հրապարակում «Քաղաքացիական պայմանագիր» կուսակցության հրավիրած հանրահավաքին: Այդ ժամանակ առողջապահության նախարար էր ոչ այլ ոք, քան Արսեն Թորոսյանը:

Սա ծանոթ ձեռագիր է: Օրինակ` 2012-ին տեղեկություններ էին տարածվում, որ բուժհիմնարկների աշխատակիցներին զանգվածաբար ստիպում են անդամակցել ՀՀԿ-ին:

Նիկոլ Փաշինյանի ընտանեկան կայքը 2017-ին իր հերթին գրում էր՝ «Վերջին օրերին սկսած գրեթե բոլոր գազալցակայանների, բենզալցակայանների, թաղապետարանի աշխատակիցներին պարտադրում են անդամագրվել ՀՀԿ-ին։ Մարդիկ նույնիսկ նեղություն չեն քաշում գնալ ՀՀԿ գրասենյակ, համապատասխան դիմումներն ուղարկվում են աշխատավայրեր եւ լրացվում հենց տեղում»:

Նիկոլ Փաշինյանը, ստանձնելով վարչապետի պաշտոնը, հավաստիացնում էր, որ որևէ նման երևույթ Հայաստանում տեղ չի ունենալու և նախկինների ավանդույթները մնալու են նախկինում: Ինչպես տեսնում ենք՝ Նիկոլ Փաշինյանի Նոր Հայաստանում էլ նախկինների ավանդույթները շարունակողների պակաս ամենևին էլ չի զգացվում...