Ինչպես են հարստանում «հպարտ քաղաքացիների» բարեկեցության համար աշխատող պաշտոնյաները

Հայաստանյան մի շարք պաշտոնյաներ ուղղակիորեն պատասխանատու են հասարակության լայն շերտերի բարեկեցության ապահովման, տնտեսական աճի, գնաճի նվազմանն ուղղված աշխատանքների համար: Սակայն, որքան էլ որ զավեշտալի չհնչի, այդ պաշտոնյաների պատասխանատվության գոտում գտնվող քաղաքացիները գնալով աղքատանում են, նրանց գրպաններին հարվածները գնալով ուժգնանում են, իսկ ահա այդ պաշտոնյաների կյանքը գնալով էլ ավելի բարեկեցիկ է դառնում: Այդ մասին են վկայում վերջինների կողմից ներկայացված հայտարարագրերը:

Դիցուք՝ էկոնոմիկայի նախարար Վահան Քերոբյանը 2019 թվականին կենտրոն վարչական համայնքում բնակարան է ձեռք բերել: Բացի դա, նա նաև հայտարարագրել է Տոյոտա մակնիշի ավտոմեքենա, 1,500,000.00 դոլարի բաժնեմաս, 20,225,133.00 դրամի եկամուտ:

Վահան Քերոբյանի տեղակալ Ռաֆայել Գևորգյանը հայտարարագրել է բնակարան Երևանի Կենտրոն վարչական շրջանում, Տոյոտա մակնիշի ավտոմեքենա,  100,000.00 ԱՄՆ դոլարի փոխառություն, բանկային հաշվի մնացորդները կազմել են 10,200.00 ԱՄՆ դոլար, 1,864,309.00 դրամ, 14,798.17 եվրո: Եկամուտները կազմել են 4,401,455.0 դրամ և 58,530.00 եվրո:

ՄՊՀ նախագահ Գեղամ Գևորգյանը ով պետք է հասարակությանը պաշտպաներ օլիգարխների նկրտումներից և մենաշնորհային դրսևորումներից հայտարարագրել է բնակարան Երևանի Արաբկիր վարչական շրջանում, Մերսեդես մակնիշի ավտոմեքենա, 46,500.00 ԱՄՆ դոլար և  32,500,000.00 ՀՀ դրամ, եկամուտները կազմել են 36,579,041.00 ՀՀ դրամ, հանգստի նպատակով կատարված ծախսերը կազմել են 2,770,157.00 ՀՀ դրամ:

ՀՇԿՀ նախագահ Գարեգին Բաղրամյանը, ով, ըստ էության, կոչված էր զսպել թանկացումները և թույլ չտալ խոշորների ախորժակի չհիմնավորված ավելացում, հայտարարագրել է բնակարան Երևանի Արաբկիր թաղամասում,  31,348,800.00 դրամի փոխառություն, բանկային ավանդները կազմել են 2,700,000.00 ՀՀ դրամ,6,600,000.00 դրամ,  5,003.65 ԱՄՆ դոլար, բանկային հաշվի մնացորդները կազմել են 3,046,105.00 ՀՀ դրամ: Տարվա սկզբում կախիկ դրամը կազմել է 57,000.00 դոլար: Եկամուտները կազմել են 137,037,789.50 ՀՀ դրամ և 4,037.96 ռուբլի: Համեմատության համար նշենք, որ 2020-ին, Բաղրամյանի նշած բանկային հաշվի մնացորդները կազմել են 1,963,344.00 ՀՀ դրամ և 4,333.06 ռուբլի:

«Տնտեսական հեռանկարների կենտրոն-հիմնադրամի» նախագահ Արթուր Ջավադյանի վերջին ձեռքբերումներից կարելի է առանձնացնել 2020 թվականին ձեռք բերված հողամասը, VOLKSWAGEN մակնիշի ավտոմեքենան և 2020-ին գնված MERCEDES-BENZ մակնիշի ավտոմեքենան:  Բաժնային արժեթղթերը կազմել են 2,162,700.00 ՀՀ դրամ: Բանկային ավանդները՝ 112,000.00 ՀՀ դրամ, 729,958.90 ԱՄՆ դոլար և 450,948.50 ՀՀ դրամ: Ջավադյանը հայտարարագրել է նաև 24,000,000.00 դրամ արժողությամբ հուշադրամ: Բանկային հաշվի մնացորդները կազմել են 5,217,745.60 ՀՀ դրամ, 15,743.00 ԱՄՆ դոլար: Կանխիկ դրամը կազմել է 6,000,000.00 դրամ, 15,000.00 ԱՄՆ դոլար և 21,000.00 եվրո: Եկամուտները կազմել են 81,176,700.30 ՀՀ դրամ, 33,436.30 ԱՄՆ դոլար և 4,998.30 եվրո:

Անշուշտ հարց է առաջանում, թե ինչպես է վերջին տասնամյակի ընթացքում պետական պաշտոններ զբաղեցրած անձը հասցրել կուտակել նման հարստություն, սակայն, այդ հարցը առավելապես ուղղված է պատկան մարմիններին, որոնք էլ և պետք է ուսումնասիրեն այդ հարստության ծագումը: Ինչպես երևում է վերը նշված հայտարարագրերից՝ ժողովրդի բարեկեցության համար օր ու գիշեր աշխատող պաշտոնյաների կյանքը իսկապես փոխվում է այդ աշխատանքի շնորհիվ, դառնում է ավելի բարեկեցիկ, ինչը չես ասի ժողովրդի մասին, որի գրպանը օր օրի էլ ավելի է դատարկվում, գնաճը էլ ավելի է խստանում, տնտեսությունն էլ ավելի է գահավիժում...