ՌԴ-ից ԱՄԷ մաքսանենգ ճանապարհով 225 կգ ոսկի տեղափոխելիս` ՀՀ քաղաքացիներ են ձերբակալվել

Մոսկվայի Սոլնցևսկի դատարանը կալանավորել է Հայաստանի քաղաքացիներ Արտակ Այվազյանին, Կարեն Դարբինյանին և Արման Հարությունյանին։ Նրանք ձերբակալվել են մայրաքաղաքի «Վնուկովո» օդանավակայանում՝ Ռուսաստանից ԱՄԷ մաքսանենգ ճանապարհով 1 կգ և 12 կգ ձուլակտորներով 225 կգ ոսկի տեղափոխելիս։ Ամբաստանյալների պաշտպանությունը կարծում է, որ քրեական գործը մաքսայինի կողմից հարուցվել է ապօրինի։ Մաքսանենգների երեք հանցակիցների՝ ՌԴ քաղաքացիների մասով հետաքննությունը սահմանափակվել է չհեռանալու մասին գրավոր պարտավորությամբ։ Այս մասին հայտնում է Kommersant-ը։

«Օդանավակայանի մեկնման սրահում մարդկանց տեղաշարժին հետևելով՝ մաքսավորները ուշադրություն են դարձրել երեք ուղևորների վրա։ Նրանք նկատելի ջանքերով քարշ էին տալիս անիվների վրա ծանր ճամպրուկները։ Երեքն էլ շարժվում էին դեպի Մոսկվա-Երևան ուղևորվող ինքնաթիռի մեկնման դարպասը։ Եվրասիական տնտեսական միության անդամ Հայաստանի քաղաքացիները, օգտվելով իրենց արտոնություններից, անվտանգ անցել են մաքսային հսկողությունը և կանգ են առել մեկնման սրահում։ Որոշ ժամանակ անց նրանց մոտեցել են երեք հոգի՝ ճամպրուկներով, բայց արդեն դատարկ։ Նրանք պատրաստվում էին, ինչպես պարզվել է ավելի ուշ, թռչելու ԱՄԷ»,-գրում է պարբերականը։

Մաքսավորները ստուգման ընթացքում ԱՄԷ թռչողների ճամպրուկներում հայտնաբերել են ոսկու 71 ձուլակտոր՝ 14-ական 12 կգ-անոց և 57 ձուլակտոր՝ 1 կգ-անոց, որոնք չեն հայտարարագրվել և մաքսային ստուգում չեն անցել։

Արդյունքում՝ հանգամանքները պարզելու համար բերման են ենթարկվել Երևանի բնակիչներ Այվազյանը, Դարբինյանը և Հարությունյանը, ինչպես նաև նրանց ռուս հանցակիցները։ Ավելի ուշ քրեական գործ է հարուցվել, քանի որ ձուլակտորների արժեքը զգալիորեն գերազանցել է 100 հազար ռուբլին։ Ձուլակտորների վրա, ըստ մաքսայինի, եղել են մետաղի որակը հաստատող սերիական համարներ, նշաններ, տառեր և արտադրական նմուշներ։