«Պարեկների աշխատավարձը 270 հազարից է սկսում, իսկ զինծառայողինը՝ 120, խրախուսմամբ հարցը չի կարգավորվի» (տեսանյութ)
ՏեսանյութերԱզգային ժողովի «Պատիվ ունեմ» խմբակցությունը պայմանագրային զինծառայողների կամավոր ատեստավորման համակարգում և «Պաշտպան հայրենյաց» ծրագրում որոշ ռիսկեր է տեսնում: Ազգային ժողովում լրագրողների հետ ճեպազրույցում այս մասին ասաց «Պատիվ ունեմ» խմբակցության քարտուղար Տիգրան Աբրահամյանը:
«Պայմանագրային զինծառայողների կամավոր ատեստավորման նախագիծը ունի բազմաթիվ ռիսկեր: Առաջին հերթին նախագծում սահմանված չէ կառավարության այն որոշումը, որով կարգավորվում է ատեստավորման գործընթացը: Այսինքն՝ ի՞նչ չափորոշիչներ հիման վրա է կատարվելու, ի՞նչ սկզբունքներով է իրականացվելու: Սա ինչո՞վ է կարևոր, որովհետև այս գործընթացի ցանկացած խափանում և անարդարության ցանկացած դրսևորում զինված ուժերում բերելու է շատ ավելի ծանր վիճակի, քան մենք այսօր ունենք: Երկրորդը՝ նույնիսկ ամենասկզբունքային և ամենաարդարացի մեխանիզմների ներդրման պարագայում էլ խրախուսման համակարգը պետք է դրվի այն ժամանակ, երբ բազային աշխատավարձը բերված է և հասցված է համապատասխան մակարդակի, և մարտական հերթապահության համար նախատեսված հավելավճարները ևս համապատասխան մակարդակի են:
Եթե օրինակ՝ պարեկային ծառայողի բազային աշխատավարձը 270 հազար դրամից է սկսվում, իսկ պայմանագրային զինծառայողի աշխատավարձը՝ 120-125 հազարից, ապա ինչպե՞ս է ստացվում, որ պատերազմական իրավիճակում ծառայություն իրականացնողի բազային աշխատավարձը ցածր է, իսկ մենք միայն խրախուսման համակարգով ենք փորձում կարգավորել, այն էլ որևէ ձևով պարզ չէ, թե այդ ատեստավորման արդյունքում որքան զինծառայող հնարավորություն կստանա ավելի բարձր աշխատավարձ ստանալ»,- ասաց Աբրահամյանը:
Ինչ վերաբերվում է «Հայրենյաց պաշտպան» ծրագրի, պատգամավորի կարծիքով՝ այստեղ ևս բավականին հարցեր կան: Ըստ պատգամավորի՝ ծրագրի արդյունավետությունը կախված է նրանից, թե իրականության մեջ ինչքանո՞վ է պետությունը տվյալ իրավիճակում զինծառայողի թիկունքին:
«Շատ կարևոր է հասկանալ, թե ի՞նչ միջավայր է ստեղծված զինված ուժերի ներսում՝ սկսած բարոյահոգեբանական վիճակից, կարգապահական խնդիրներից և այլն: Այսինքն՝ ինչքանո՞վ ենք մենք առհասարակ խրախուսում երիտասարդներին, որ զինված ուժեր գնան, այս դեպքում՝ պայմանագրային կարգավիճակով: Ծրագրի իրատեսության առումով բազմաթիվ խնդիրներ ևս տեսնում ենք, բայց ինքնին՝ որպես պայմանագրային զինծառայությանը որևէ ձևով աջակցող ծրագիր, այս դեպքում նախագծին կողմ ենք քվեարկել: Սա համարում ենք առաջին հերթին շանս բոլոր երիտասարդների համար, ովքեր ցանկություն կունենան 6 ամիս հետո ընտրել պայմանագրային ծառայությունը»,- եզրափակեց Աբրահամյանը:
ՈՒՂԻՂ ԵԹԵՐ
Ամենադիտված 
Պատմական հաղթանակ․ Հայաստանը դարձավ աշխարհի առաջնության մեդալային հաշվարկի հաղթող
